13.05.2026 | 19:20
Թրամփը հայտարարել է՝ Իրանի միջուկային ծրագրի դադարեցումն ավելի կարևոր է ամերիկացիների ֆինանսական դժվարություններին
Երեխա է վիրավորվել Թեհրանի հայկական թաղամասում. ինչ է կատարվում պատերազմի 12-րդ օրը
Հասարակություն
11.03.2026 | 16:03
Այս գիշեր հարված է հասցվել Թեհրանի Մաջիդիե հայկական թաղամասին։ Զոհերի մասին է հաղորդվում, սակայն ոչ հայերի շրջանում։
«Հարված է հասցվել Թեհրանի հայկական Մաջիդիե թաղամասին, դրան մոտ հայկական միության ապակիներն են փշրվել, հայերի շրջանում ոչ ոք լուրջ վնասվածքներ չի ստացել։ Ըստ լուրերի՝ հարվածից հետո 20 մարդ զոհվել է, նրանց թվում հայեր չկան, բայց մի փոքր հայ երեխա վիրավորվել է»,- Factor TV-ի հետ զրույցում հայտնեց Թեհրանի հայկական «Արաքս» թերթի գլխավոր խմբագիր Մովսես Քեշիշյանը։
Ըստ Քեշիշյանի՝ ԱՄՆ-ը և Իսրայելը ռազմական օբյեկտներից բացի թիրախավորում են նաև ոստիկանական բաժանմունքները։ Հայկական թաղամասում թիրախը եղել է հենց ոստիկանատունը։
Մերձավոր Արևելքում պատերազմի արդեն 12-րդ օրն է։ Իրանը հայտարարել է ամենախոշոր հարձակման մասին հակամարտության սկզբից ի վեր՝ հրթիռներով և անօդաչուներով հարվածելով Իսրայելին և տարածաշրջանում ամերիկյան օբյեկտներին։ Իսկ Իսրայելն ու ԱՄՆ-ը շարունակում են օդային հարվածները Իրանի տարածքում։ Միացյալ Նահանգները ամեն օր շուրջ 900 միլիոն դոլար է ծախսում ռազմական գործողությունների վրա։ Թե որքան կտևի պատերազմը՝ կանխատեսումները շատ տարբեր են։
«Նախագահը դրել է շատ կոնկրետ առաքելություն, որը պետք է իրականացվի, և մեր գործն է անխոնջ կերպով դա իրականացնել։ Հիմա նա է կառավարում արագությունը։ Նա է, որ որոշում է կայացնում, թե երբ ենք մենք հասնում այդ կոնկրետ նպատակներին։ Իմ գործը չէ ենթադրել՝ սա սկիզբն է, միջնամասը, թե վերջը։ Դա նրա գործն է, և նա կշարունակի հաղորդել դրա մասին»,- նշեց Պենտագոնի ղեկավար Փիթ Հեգսեթը։
Երկուշաբթի հաստատվեց, որ սպանված հոգևոր առաջնորդ Ալի Խամենեիին փոխարինելու է որդին՝ Մոջթաբա Խամենեին։ Երկու օր անց The New York Times-ը գրում է, որ նոր առաջնորդը վիրավորվել է ոտքերից այն նույն հարվածների ընթացքում, որոնց հետևանքով սպանվել էր նրա հայրը։ Իրանական աղբյուրները պնդում են՝ նա «ողջ ու առողջ է»։ Նոր առաջնորդի գլխավոր անելիքը, ըստ Մովսես Քեշիշյանի, պատերազմը դադարեցնելն է։
Մինչ այդ ԱՄՆ զինված ուժերը հայտարարել են, որ ոչնչացրել են Իրանի 16 նավ, որոնք, ըստ Վաշինգտոնի, փորձում էին ականապատել Հորմուզի նեղուցը։
Եվգենյա Համբարձումյան
