30.09.2026 | 14:01
Մեծ Բրիտանիայի պաշտպանության նախարարը Բաքվում է
Հայաստանը ճի՞շտ, թե՞ սխալ ուղղությամբ է շարժվում. IRI հարցման արդյունքները․ ՏԵՍԱՆՅՈՒԹ
Քաղաքականություն
06.03.2026 | 12:43
Եթե 2018-ի հետհեղափոխական շրջանում բնակչության 73%-ը կարծում էր, որ Հայաստանը ճիշտ ուղղությամբ է գնում, ապա 2026-ի փետրվարի դրությամբ այդ կարծիքին է Հայաստանի բնակչության 47%-ը։ Այս տվյալներն ամփոփված են Միջազգային հանրապետական ինստիտուտի (IRI) հետազոտությունում։
Սակայն 2025 թվականի հունիսին գրանցած 36%-ի համեմատ այս ցուցանիշը 11%-ով աճել է․ ստացվում է վերջին շրջանում հանրության մի հատվածի մոտ փոխվել է կարծիքը երկրի ընթացքի վերաբերյալ։
Հետազոտության արդյունքներով՝ երիտասարդ (18-35) և միջին տարիքի (36-55) անձանց շրջանում ավելի շատ են նրանք, ովքեր կարծում են, որ երկիրը գնում է սխալ ուղղությամբ (համապատասխանաբար 44% և 45%)։ Մինչդեռ ավագ սերնդի (56+) 55%-ը վստահ է, որ ուղղությունը ճիշտ է։
Ըստ հարցման՝ տղամարդիկ ավելի դրական են գնահատում իրավիճակը, քան կանայք։ Կանանց շրջանում 45%-ը կարծում է, որ երկիրը գնում է սխալ ուղղությամբ, այնինչ՝ տղամարդկանց 37% է այս կարծիքին։
Հարցված երևանաբնակների գրեթե կեսը (47%)՝ նշել է «սխալ ուղղությամբ» տարբերակը։ Գյուղական վայրերում պատկերը ճիշտ հակառակն է՝ հարցվածների մեծամասնությունը՝ 54%-ը, երկրի ընթացքը համարում է ճիշտ։
Հետաքրքիր է, որ անկախ տարիքից, սեռից կամ բնակավայրից՝ հարցին պատասխանել դժվարացողների կամ հրաժարվողների տոկոսը կայուն է՝ տատանվելով 10%-13%-ի միջակայքում:
Հարցումն անցկացվել է 2026 թվականի փետրվարի 3-ից 13-ը։ Ընտրանքը կազմված է 18 տարին լրացած 1506 ՀՀ քաղաքացիներից և Լեռնային Ղարաբաղից բռնի տեղահանված ԼՂ նախկին բնակիչներից, որոնք այժմ բնակվում են Հայաստանում (որոնք կարող են լինել կամ չլինել քաղաքացիներ)։
Այն քաղաքացիները, որոնք ապրել են Հայաստանում ավելի քիչ, քան 6 ամիս, չեն ներառվել ընտրանքում։
