03.04.2026 | 23:13
NASA-ն հրապարակել է Երկրի նոր լուսանկարը
«Աջափնյակ» մետրոյի կայարանի կառուցումը կարող է տևել 57-81 ամիս
Հասարակություն
03.03.2026 | 18:40
Երևանի մետրոպոլիտենի նոր՝ «Աջափնյակ» կայարանի կառուցման նպատակով ազդեցության ենթակա տարածքների նկատմամբ հանրության գերակա շահ ճանաչելու գործընթաց կսկսվի։ Նախագիծը հանրային քննարկման է ներկայացվել։
Նոր կայարանի գիծը սկիզբ է առնելու «Բարեկամություն» կայարանից և հասնելու է մինչև Հալաբյան-Աբելյան փողոցների խաչմերուկ։ Նախագծի համաձայն՝ կառուցվող գծի ընդհանուր երկարությունը կազմելու է 1500 մետր, որից մետրոկամուրջի երկարությունը շուրջ 210 մետր է։ Ծրագրի շրջանակներում հանրային գերակա շահ կճանաչվի մոտ 41,130 քմ տարածք, որտեղ նույնականացվել է 31 գույք։
Ըստ նախագծային փաստաթղթերի՝ հողերի օտարման համար գնահատված ծախսը կազմում է շուրջ 9.6 միլիարդ ՀՀ դրամ։ Սեփականության օտարման գործընթացի վերջնաժամկետ է սահմանվել 2027 թվականի մարտի 15-ը։ Շինարարական աշխատանքների մեկնարկն ակնկալվում է 2026 թվականին։ Ծրագրի ամբողջական տևողությունը նախատեսվում է մինչև 5 տարի (57 ամիս), իսկ փուլային կառուցման տարբերակի դեպքում այն կարող է տևել մինչև 81 ամիս։
Հիմնավորման մեջ նշվում է, որ նախագիծը նպատակ ունի բեռնաթափել Երևանի վերգետնյա տրանսպորտը, նվազեցնել խցանումները և օդի աղտոտվածությունը։ Ակնկալվում է, որ նոր կայարանը հասանելի կդառնա ավելի քան 150,000 բնակչի համար՝ ապահովելով արագ և էկոլոգիապես մաքուր տեղաշարժ։
Եվգենյա Համբարձումյան
