ՀՀ քաղաքացիները Աբու Դաբիից ու Դուբայից անվճար կտեղափոխվեն Մասկատ՝ իրենց միջոցներով Երևան վերադառնալու համար

Արաբական Միացյալ Էմիրություններում ՀՀ դեսպանությունից հայտնում են, որ ԱՄԷ-ում ՀՀ դեսպանությունը և Դուբայում ՀՀ գլխավոր հյուպատոսությունը կազմակերպում են ՀՀ քաղաքացիների՝ Աբու Դաբիից և Դուբայից մինչև Մասկատի օդանավակայան անվճար տեղափոխությունը՝ Մասկատ-Երևան չվերթով ՀՀ տեղափոխվելու համար։

«Տեղեկացնում ենք, որ այն քաղաքացիները, ովքեր արդեն ունեն և ձեռք կբերեն Fly One ընկերության կողմից մարտի 4-ին երեկոյան ժամը 21:00-ին կայանալիք Մասկատ-Երևան տոմսերը, կարող են օգտվել ԱՄԷ-ում ՀՀ դեսպանության և Դուբայում ՀՀ գլխավոր հյուպատոսության կողմից կազմակերպված անվճար տեղափոխման հնարավորությունից։

Նշենք նաև, որ Մասկատ-Երևան թռիչքի տոմսերը կարող եք ձեռք բերել՝ զանգահարելով հետևյալ հեռախոսահամարին՝ +37494366540։

Տեղափոխման ցանկություն ունեցող քաղաքացիներին խնդրում ենք անհատապես գրանցվել հետևյալ հղումով՝ https://url-shortener.me/FC08՝ մինչև երեկոյան ժամը 20։00-ն:

Ավտոբուսների շարժման վայրի տվյալները՝

Աբու Դաբի- ԱՄԷ-ում ՀՀ դեսպանության տարածքից (President Joko Widodo str. 63)՝ մարտի 4-ին ժամը 02:00-ին՝ ուղևորների հավաքը ժամը 01:30-ին։

Դուբայ՝ ՀՀ գլխավոր հյուպատոսության տարածքից (GoldCrest Executive Tower, JLT, Cluster C) մարտի 4-ին ժամը 02:00-ին՝ ուղևորների հավաքը ժամը 01:30-ին։

Խնդրում ենք բացառապես գրանցվել այն քաղաքացիներին, ովքեր արդեն ունեն մարտի 4-ին կայանալիք Մասկատ-Երևան թռիչքի հաստատված տոմս։

Խնդրում ենք նաև հաշվի առնել, որ Աբու Դաբիից և Դուբայից մինչև Մասկատի օդանավակայան ճանապարհի տևողությունը կազմում է մոտավորապես 12-ից 13 ժամ»,- ասված է հաղորդագրությունում։

Հիշեցնենք, որ Իրանի վրա ԱՄՆ-ի ու Իսրայելի հարձակումից հետո ՀՀ ԱԳՆ-ն հանդես էր եկել հայտարարությամբ՝ Իրանում և Իսրայելում գտնվող ՀՀ քաղաքացիներին հորդորելով պահպանել անվտանգության կանոնները և հետևել պաշտոնական ցուցումներին։

Քիչ առաջ տեղեկացրել էինք նաև, որ այսօր վաղ առավոտյան Երևանում վայրէջք է կատարել Օմանից տարհանման առաջին չվերթը։