«Հենց նավ մտանք՝ հարվածները սկսվեցին»․ Դուբայում գտնվող հայերը չեն կարողանում վերադառնալ. ՏԵՍԱՆՅՈՒԹ

Դուբայում գտնվող լրագրող Նատա Հարությունյանը զբոսանավով պետք է երեք երկիր այցելեր ու հինգ քաղաքով շրջագայեր։ Այժմ կրուիզը չեղարկվել է, նավն էլ կանգնած է նավահանգստում։ 

ՀՀ ԱԳՆ-ն կարիքների գնահատում է իրականացնում, թռիչքի կազմակերպման դեպքում առաջնահերթությունը տրվելու է կանանց, երեխաներին, տարեցներին և առողջական խնդիր ունեցողներին։ Թե քանի հոգի է դիմել վերադառնալու համար, ինչ իրավիճակ է հայերի շրջանում, նախարարությունից դեռևս չեն նշում։ 

ԱԳՆ խոսնակ Անի Բադալյանը Factor TV-ին փոխանցեց, որ ավելի ուշ լրացուցիչ տեղեկատվություն կտրամադրվի։ Մինչ այդ, Մերձավոր Արևելք հանգստի մեկնածները սոցցանցերում են տագնապած գրառումներ անում՝ փորձելով հասկանալ՝ ո՞ւր գնալ և ի՞նչ անել ապահով լինելու համար կամ ինչպե՞ս գտնել Հայաստան վերադառնալու տարբերակներ։ 

Իսրայելը, Կատարը, Սիրիան, Իրանը, Իրաքը, Քուվեյթը, Բահրեյնը և Արաբական Միացյալ Էմիրություններն ամբողջությամբ կամ մասնակի փակել են իրենց օդային տարածքները։ Տասնյակ հազարավոր զբոսաշրջիկներ մնացել են օդանավակայաններում։

Այս ընթացքում շարունակում են չեղարկվել դեպի Երևան ու Երևանից իրականացվող մի շարք թռիչքներ։ Այսօր չեղարկվել են Թեհրանից, Շարժայից, Աբու Դաբիից, Դուբայից ու Թել Ավիվից Երևան ժամանող չվերթները։ Չեն կայանա Երևանից չվերթները դեպի Թեհրան, Դուբայ, Շարժա և Աբու Դաբի։ Փակ գոտիները շրջանցելու և չվերթների ուղղությունը փոխելու պատճառով մյուս երկրներից եկող օդանավերն էլ ժամանում են ուշացումներով։

Ի դեպ, Աբու Դաբիից մասնակիորեն վերսկսել են թռիչքները․ Etihad Airways-ը պաշտոնապես վերսկսել է թռիչքներն այսօր տեղական ժամանակով 14:30-ին: Թռիչքներն իրականացվում են Օմանի օդային տարածքով։ Emirates-ը և FlyDubai-ը հայտարարել են, որ թռիչքները կվերսկսեն մարտի 3-ին։

Իսրայելի իշխանությունները հայտարարել են, որ այսօր երեկոյան նախատեսում են աստիճանաբար բացել օդային տարածքը քաղաքացիական ավիացիայի համար:

Իսկ ահա Հորդանանն այսօրվանից բոլոր չվերթների համար ամեն օր ժամը 18:00-ից մինչև 09:00-ն ամբողջությամբ կփակի իր օդային տարածքը։

Իրաքի օդային տարածքը լիովին փակ է մինչև մարտի 4-ի կեսօր։ Իրանում թռիչքներն արգելված են առնվազն մինչև մարտի 3-ը։ Լիբանանն այսօրվա բոլոր թռիչքները չեղարկել է` հայտարարելով, որ իրավիճակը կվերանայի վաղը։

Դոհայի,  Քուվեյթի և Բահրեյնի օդային տարածքները շարունակում են փակ մնալ։ 

Մանրամասները՝ տեսանյութում։

Անի Թամրազյան