14.09.2026 | 16:35
Գրոնոն Երևանում քննարկել է Հայաստանի և Ադրբեջանի միջև խաղաղության ինստիտուցիոնալացումը՝ Բաքու և Արցախ այցից հետո
Փաշինյանին վիրավորելու համար «Այվազովսկի» օգտատիրոջ նկատմամբ տնային կալանք ու բացակայելու արգելք է կիրառվել․ փաստաբան
Հասարակություն
27.02.2026 | 14:52
ՏիկՏոկում շուրջ 6000 հետևորդ ունեցող «Այվազովսկի» անունով հայտնի Հայկ Եղյանի նկատմամբ նշանակվել է տնային կալանք և բացակայելու արգելք: Այս մասին հայտնում է նրա պաշտպան Ռոման Երիցյանը: Քրեական վարույթը նախաձեռնվել է տեղեկատվական կամ հաղորդակցական տեխնոլոգիաներն օգտագործելով՝ խուլիգանության հատկանիշներով։
Ռոման Երիցյանն ավելի վաղ ասել էր, որ Հայկ Եղյանին ձերբակալելու ու մեղադրանք առաջադրելու պատճառն այն է, որ օգտատերը սոցհարթակում վիրավորել է Նիկոլ Փաշինյանին։
«Ինչ-որ կուսակցության նախագահ այդ փաստի կապակցությամբ ներկայացրել է հաղորդում՝ նշելով, որ վաղը կարող է ՀՀ վարչապետ ինքը լինել և իր համար անընդունելի է, երբ վարչապետին վիրավորում են»,- ֆեյսբուքյան տեսանյութում ասել էր փաստաբանը։
Հայկ Եղյանը, ըստ պաշտպանի, քաղբանտարկյալ է, քանի որ, ըստ նրա, քրեական հետապնդման է ենթարկվել ընդամենը քաղաքական կոշտ գնահատական հնչեցնելու համար։ Այդուհանդերձ, «Այվազովսկի» օգտատիրոջ տիկտոկյան էջի տեսանյութերի մեծ մասում հնչում են հայհոյանքներ ու վիրավորանքներ։ Թե կոնկրետ որ տեսանյութից հետո է կուսակցության նախագահը դիմել ոստիկանություն, հայտնի չէ, բայց, օրինակ, տեսանյութերից մեկում Հայկ Եղյանը Փաշինյանի՝ Էրդողանը գիրքը ձեռքին լուսանկարի ֆոնին ռուսերենով մեկնաբանություններ է անում ու հայհոյանքներ հնչեցնում նրա աջակիցներից մեկի հասցեին։
Արփի Հակոբյան
