18.08.2026 | 12:57
«Յաբլոկո»-ն պարտվեց․ ՌԴ ԿԸՀ-ն կուսակցությանը հանել է Դումայի ընտրությունների քվեաթերթիկից
Միհրան Պողոսյանին առնչվող կոկաինի գործով հետախուզվողի որդին Ռուսաստանում տեսակցել է հորը․ ՏԵՍԱՆՅՈՒԹ
Հասարակություն
24.02.2026 | 15:55
ԴԱՀԿ նախկին պետ Միհրան Պողոսյանին առնչվող կոկաինի գործով մեղադրյալ Գագիկ Բադալյանի որդին՝ Յակոբ Բադալյանը, պնդում է, որ հայրն ու քավորը՝ Միհրան Պողոսյանը, կապ չունեն 2023-ին հայտնաբերված թմրանյութի հետ։ Ավելին՝ իրենք են Հայաստան ներկրված ապրանքի մեջ հայտնաբերել թմրանյութի տարաներն ու դրա մասին տեղյակ պահել Ազգային անվտանգության ծառայությանը։
Նշենք, որ Միհրան Պողոսյանն ու Գագիկ Բադալյանն այս գործով հետախուզման մեջ են։ Բադալյանի որդին դատարանի շենքի դիմաց լրագրողների հետ զրույցում ասաց, որ արդեն երկրորդ նիստն է հետաձգվում, ինչի պատճառով չեն կարողանում միջնորդություն ներկայացնել հետախուզման մեջ գտնվող հոր խափանման միջոց կալանքը այլ խափանման միջոցով փոխելու վերաբերյալ։
Որդու խոսքով՝ եթե հոր խափանման միջոցը փոխվի, նա կվերադառնա Հայաստան։
«3 տարի է՝ հորս Հայաստանում չեմ տեսել, 2 անգամ գնացել եմ Ռուսաստան, որ հորս տեսնեմ»,- ասաց հետախուզվողի որդին, որից, ըստ էության պարզ է դառնում, որ հետախուզման մեջ գտնվող հայրը Ռուսաստանի Դաշնությունում է։
Հիշեցնենք, որ ՀՀ ազգային անվտանգության ծառայությունում 2023 թվականի մայիսի 13-ին նախաձեռնված քրեական վարույթի նախաքննության ընթացքում պարզվել է, որ Հայաստանում գործող և մրգերի ներմուծմամբ զբաղվող «Մրգենի» ընկերության կողմից Էկվադորում գտնվող ընկերությունից պատվիրված ապրանքատեսակի՝ բանանի հետ տարանցիկ երկրների՝ Պանամայի Հանրապետության, Իտալիայի Հանրապետության և Վրաստանի տարածքով Հայաստանի Հանրապետություն է ներմուծվել «կոկաին» տեսակի թմրամիջոց (շուրջ 250 միլիոն եվրո արժողությամբ)։
Մանրամասները՝ տեսանյութում։
Արաքս Մամուլյան
