Կոկաինի գործով նիստը, որով ԴԱՀԿ նախկին պետ Միհրան Պողոսյանը մեղադրյալ է, հետաձգվեց

Երևանի քրեական դատարանում՝ նախագահությամբ դատավոր Գնել Գասպարյանի, այսօր նշանակված էր 2023 թվականին հայտնաբերված թմրանյութի գործով դատական նիստը, որի շրջանակներում մեղադրյալ է նաև ԴԱՀԿ ծառայության նախկին պետ, այժմ՝ հետախուզման մեջ գտնվող Միհրան Պողոսյանը։ Վերջինիս նկատմամբ հեռակա վարույթ է իրականացվում։ Նիստին, սակայն, մյուս մեղադրյալները և վերջիններիս պաշտպանները չէին ներկայացել: Դատարանը նրանցից ոմանց բացակայությունը անհարգելի գնահատեց և ստիպված եղավ հետաձգել դատական նիստը:

Հիշեցնենք, որ  ՀՀ ազգային անվտանգության ծառայությունում 2023 թվականի մայիսի 13-ին նախաձեռնված քրեական վարույթի նախաքննության ընթացքում պարզվել է, որ Հայաստանում գործող և մրգերի ներմուծմամբ զբաղվող «Մրգենի»  ընկերության կողմից Էկվադորում գտնվող ընկերությունից պատվիրված ապրանքատեսակի՝ բանանի  հետ տարանցիկ երկրների՝ Պանամայի Հանրապետության, Իտալիայի Հանրապետության և Վրաստանի տարածքով  Հայաստանի Հանրապետություն է ներմուծվել «կոկաին» տեսակի թմրամիջոց՝ շուրջ 250 միլիոն եվրո արժողությամբ։ Պաշտոնական հաղորդագրության մեջ նշված էր, որ թմրամիջոցը մոտ 1 տոննա է։

Բացի Միհրան Պողոսյանից գործով մեղադրյալի կարգավիճակ ունեն նաև «Մրգենի» ՍՊԸ-ի տնօրեն Լևոն Աթաջանյանը, նույն ընկերության գնումների և ներմուծումների բաժնի պետ Մելիտա Ղազարյանը, Սամվել Գալուստյանը  և Գագիկ Բադալյանը:

Նրանք մեղադրվում են նախնական համաձայնությամբ, իրացման նպատակով, առանձնապես խոշոր չափերով «Կոկաին» տեսակի թմրամիջոց ապօրինի ձեռք բերելու և պահելու, ինչպես նաև մաքսային հսկողությունից թաքցնելով` ՀՀ պետական սահմանով ապօրինի առանձնապես խոշոր չափերով (788 կգ) «Կոկաին» տեսակի թմրամիջոց տեղափոխելու համար:

Այսինքն՝ թեև ի սկզբանե հայտարարվել է մոտ 1 տոննա կոկաին հայտնաբերելու մասին՝ քրեական վարույթում դրա քաշը նշված է 788 կգ։

Արաքս Մամուլյան