27.10.2026 | 00:08
Վարդան Մինասյանն աշխատանքի է անցել Լիբանանում
Ո՛չ բաղնիք կա, ո՛չ զուգարան, էս պայմաններում երկու երեխա եմ պահում․ տնակում ապրող կինը նպաստից զրկվել է. ՏԵՍԱՆՅՈՒԹ
Հասարակություն
23.02.2026 | 19:45
43-ամյա Ծովինար Ստեփանյանը երկու անչափահաս երեխաների հետ Գառնիի ծայրամասի վագոն-տնակում է ապրում։ Պատմում է՝ 2020 թվականին Քարվաճառից հայրենի գյուղ է եկել, մինչ այդ վարձով է ապրել, իսկ տնակն անցած տարի է գնել։
Ասում է՝ նույն գյուղում են ապրում նաև ծնողները, քույր-եղբայրները, որոնցից, սակայն, օգնություն չի ակնկալում։ Արդեն երրորդ ամիսն է՝ Ծովինարն անապահովության նպաստ չի ստանում, դիմում է, սակայն մերժում է ստանում։ Չի կարողանում գրանցումից դուրս գալ, քանի որ հաշիվները ԴԱՀԿ-ի կողմից կալանքի տակ են։ Պատմում է՝ տարիներ առաջ տանիքից ընկել ու հիվանդանոցում է հայտնվել, այդ ժամանակ վարկ է վերցրել, հետո էլ փակել չի կարողացել ու հայտնվել է արգելանքի տակ։
Factor TV-ն Աշխատանքի և սոցիալական հարցերի նախարարությանից հետաքրքրվեց, թե ինչպես է նախարարությունը նման դեպքերին արձագանքում։ Նշենք, որ Կոտայքի և Սյունիքի մարզերում 2025-ի մարտի 17-ից անապահովության գնահատման պիլոտային ծրագիր է ներդրվել, ինչն էլ համակարգում փոփոխությունների պատճառ է դարձել։
Նախարարությունից հայտնում են, որ անապահովության նպաստի գնահատման նոր համակարգով պայմանավորված՝ մարդկային գործոնը նվազագույնի է հասցված, և համակարգն է տեսնում՝ ով է պահանջներին համապատասխան, ով՝ ոչ։
Ծովինարն այս պահին ապրելու տարրական պայմաններ անգամ չունի։ Ասում է՝ շաբաթական մեկ օր ռեստորանում մաքրություն է անում, իսկ մնացած ժամանակ հիմնականում երեխաների հետ բանջար քաղելու է գնում։ Նշում է՝ աղջկան չի կարող մենակ թողնել ու երկար ժամանակ տնից բացակայել։ Տղան խոսքի խնդիր ունի, դպրոցում լոգոպեդ է աշխատում երեխայի հետ, սակայն նյարդաբանի նշանակած դեղը գնել չի կարողանում։ Ծովինարն ինքն էլ առողջական խնդիրներ ունի։
Մանրամասները՝ տեսանյութում։
Անի Թամրազյան
