Ծափաթաղում սպանված Տիգրանի քույրն ու եղբայրները 4 ամիս անց վերադարձել են մոր մոտ

Լուրեր

17.11.2026 | 19:01
Որտեղի՞ց էր այն փողը, որը տալիս էր․ Վահագն Ալեքսանյանը՝ Արսեն Գևորգյանի մասին. ՏԵՍԱՆՅՈՒԹ
17.11.2026 | 18:49
Թուրքիայի դատարանն ընդդիմադիր Sözcü TV-ն պետական ​​վերահսկողությանն է փոխանցել․ ոստիկանությունը ձերբակալել է ղեկավարներին
17.11.2026 | 18:28
Թրամփը հայտարարել է, որ Վաշինգտոնի վրա հարձակման դեպքում Իրանը շատ մեծ գին կվճարի
17.11.2026 | 18:22
Եթե ես վաղը բանտում մահանամ, ինձ հետ սենց չվարվեք հանկարծ․ Եղոյանը՝ Արսեն Գևորգյանի մահվան մասին․ ՏԵՍԱՆՅՈՒԹ
17.11.2026 | 18:15
Խցանումներից խուսափելու համար քննարկվում են կենտ ու զույգ համարներով երթևեկության սահմանափակումներ և տուգանքների խստացում․ Ավինյան
17.11.2026 | 18:10
Շաքի մտած ադրբեջանցու գործողությունները՝ ըստ մեղադրանքի // Պապիկյանը Բրյուսել է մեկնել․ ԼՈՒՐԵՐ
17.11.2026 | 18:02
Բրազիլիայի հավաքականը խփեց 7 գոլ, Վինիսիուսի հեթ-տրիկը. ՏԵՍԱՆՅՈՒԹ
17.11.2026 | 17:54
Կատարը նախազգուշացրել է՝ Իրանի հարձակումը Բահրեյնում ԱՄՆ ռազմաբազայի վրա սպառնում է խաղաղ բանակցություններին
17.11.2026 | 17:45
Ընկերությունները կարող են քրեական պատասխանատվության ենթարկվել, նույնիսկ եթե հանցանք կատարած անձը հայտնի չէ․ ԱՆ-ի նոր առաջարկը
17.11.2026 | 17:37
ՔՊ-ից մի հոգի է ցավակցություն հայտնել․ Նարեկ Կարապետյանը՝ Արսեն Գևորգյանի մահվան մասին․ ՏԵՍԱՆՅՈՒԹ
17.11.2026 | 17:28
Հայաստանում կարող են վերանայվել բենզալցակայանների՝ բնակելի շենքերից հեռավորության և հողատարածքի նվազագույն մակերեսի պահանջները
17.11.2026 | 17:17
«Վերահաստատեցինք՝ համեղ ծիրանները հայկական են»․ դեպի ԵՄ երկրներ հայկական արտադրանքի արտահանումն աճում է․ Միրզոյանը հանդիպել է Մաթա Կոսի հետ
17.11.2026 | 17:07
Հայաստանի Մ-17 հավաքականը ոչ-ոքի խաղաց Լյուքսեմբուրգի հետ. ՏԵՍԱՆՅՈՒԹ
17.11.2026 | 17:00
Երևանի փողոցներում լքված գույքը կտեղափոխվի հատուկ տարածք․ սեփականատերերին 6 ամիս ժամանակ կտրվի՝ այն հետ պահանջելու համար
17.11.2026 | 16:52
Սկսվել է «Տիգրան ջան, սիրուն չի» օպերացիա. Գևորգ Ստեփանյան․ ՏԵՍԱՆՅՈՒԹ
Բոլորը

Ծափաթաղում սպանված 3-ամյա Տիգրանի քույրն ու 3 եղբայրները մոտ երկու շաբաթ առաջ վերադարձել են տուն՝ մայրիկի մոտ։ Երեխաները ՀՕՖ-ի «Մարդիգյան» երեխաների պաշտպանության կենտրոնում էին։ 

«Երկու հանգամանք է աշխատել երեխաների վերադարձի վերաբերյալ որոշման հարցում։ Առաջինը՝ մոր խնդրանքները։ Համապատասխան օղակները՝ խնամակալության հանձնաժողովը, համայնքի պատասխանատուները բավական ժամանակ չէին շտապում երեխաների վերադարձի վերաբերյալ որոշում ընդունել, որովհետև պարզ չէր՝ այն, ինչ տեղի է ունեցել, որքանով էր մորը հայտնի»,- ասում է ՀՕՖ-ի «Մարդիգյան» երեխաների պաշտպանության կենտրոնի գործադիր տնօրեն Միրա Անտոնյանը։

Նա նկատի ունի՝ պարզ չէր՝ արդյո՞ք երեխաների մայրն իմացել ու լռել է, թե՞ առհասարակ չի իմացել, թե ինչ է տեղի ունեցել փոքրիկի հետ։ 

«Ամենայն հավանականությամբ, համոզվեցին, որ մայրը որևէ կերպ տեղյակ չի եղել, որովհետև կայացվեց շատ կարևոր որոշում, որ երեխաները պիտի վերամիավորվեն մոր հետ»,- ընդգծում է Անտոնյանը։

Միրա Անտոնյանն ասում է՝ բացի մոր խնդրանքներից՝ երեխաների հոգեբանական վիճակը նույնպես հաշվի են առել կենտրոնից նրանց տեղափոխելու համար։ Նշում է՝ այս փուլում ընտանիքը պետք է գտնվի մշտական վերահսկողության ներքո։

Երեխաները 6 ամիս ժամկետով են տեղափոխվել։ Եթե ամեն ինչ լավ լինի, նրանք կշարունակեն մնալ մոր մոտ, եթե ոչ, ապա կրկին կտեղափոխվեն ՀՕՖ։  Գեղարքունիքի մարզպետ Կարեն Սարգսյանի խոսքով՝ օրեր առաջ մարզպետարանի խնամակալության ու հոգաբարձության հանձնաժողովն ուսումնասիրել է ընտանիքի բնակության պայմանները։

«Մարզպետի աշխատակազմն իրենց հատկացրել է ֆինանսական աջակցություն՝ վառելիքի և մնացած պարագաների ձեռքբերման համար։ Համայնքապետարանը ևս աջակցություն է տրամադրել, եթե ճիշտ եմ հիշում, սննդի փաթեթ է հատկացվել 50,000 դրամի չափով»,- նշում է մարզպետը։

Սարգսյանը վստահեցրեց, որ ընտանիքը կմնա խնամակալության հանձնաժողովի մշտադիտարկման ներքո, և անհրաժեշտության դեպքում նրանց կտրամադրվի նոր աջակցություն։ Պաշտոնյայի խոսքով՝ երեխաները հաճախում են դպրոց, և որևէ խնդիր չի արձանագրվել թե՛ ուսման, թե՛ հասակակիցների հետ շփման առումով։ Միրա Անտոնյանն ասում է՝ բարդ էր երեխաների հետ աշխատանքը, հատկապես Տիգրանի՝ խոսքի խնդիրներ ունեցող եղբոր, որը, ըստ ամենայնի, ականատես է եղել սպանությանը։

Կենտրոնում փորձել են հասկանալ՝ ինչո՞վ է պայմանավորված երեխայի վարքը, որքանո՞վ է հնարավոր նվազեցնել տեղի ունեցածի ազդեցությունը։ Սպանությանը, ենթադրաբար, ականատես երեխան դեպքից հետո ձեռքն անընդհատ կոկորդին էր տանում, Անտոնյանն ասում է՝ կենտրոնում չի խոսել, բայց  դադարել է այդ գործողությունն անել։

Երեխաներն ապրում են մոր հետ առանձին, այն տանը, որտեղ նախկինում էին բնակվում՝ սոցիալապես ծանր պայմաններում։ Ընտանիքում միակ աշխատողը մայրն է, ընտանիքը ստանում է նաև հաշմանդամության թոշակ։ 3-ամյա Տիգրան Օվանեսովին սպանած հայրը՝ Արմեն Օվանեսովը, կալանավորված է։ 

Պաշտոնական վարկածով՝ Տիգրանը տնից դուրս էր եկել իրենից ավագ եղբոր հետ։ Հետո ճանապարհին հանդիպել են հորը, և վերջինը ձեռքով կոկորդից սեղմելու եղանակով սպանել է երեխային։ Փոքրիկի դին հայտնաբերվել էր մի քանի օր տևած որոնողական աշխատանքների արդյունքում՝ Ծափաթաղից մի քանի կմ հեռու։ 

Ըստ մեղադրանքի՝ երեխային սպանելուց հետո հայրը դիակը դաշտամիջյան տարբեր հատվածներում թաքցնելուց հետո տեղափոխել էր Ջիլ բնակավայր տանող խաչմերուկին հարակից դաշտամիջյան հատված։ Գործն ուղարկվել է դատարան, մեղադրյալ Արմեն Օվանեսովը կալանքի ժամկետը երկարձգվել է մինչև ապրիլի 3-ը։

Մանրամասները՝ տեսանյութում։

Արփի Հակոբյան