07.09.2026 | 17:54
Արարատ Միրզոյանն ու Լատվիայի ԱԳ նախարարը արձանագրություն են ստորագրել
Դատարանը պարտավորեցրել է վերացնել Սերժ Սարգսյանի նկատմամբ կիրառված խափանման միջոցը
Հասարակություն
18.02.2026 | 17:02
Դատարանը Դատախազությանը պարտավորեցրել է վերացնել Սերժ Սարգսյանի նկատմամբ ընտրված խափանման միջոց բացակայելու արգելքը։ Այս մասին Factor TV-ի հարցին ի պատասխան հայտնեցին Հակակոռուպցիոն դատարանից։ Խոսքը դատարանի նախագահ Խաչիկ Ղազարյանի վարույթում գտնվող գործի մասին է, սակայն, ըստ Հակակոռուպցիոն դատարանից հայտնած տեղեկության, որոշումը կայացվել է նրան փոխարինող դատավորի կողմից։
«Քանի որ դատավորը փոխարինող է եղել, այդ պատճառով նա չէր կարող վերացնել: Դատավորը պարտավորեցրել է Դատախազությանը՝ վերացնել կիրառված խափանման միջոցը»,- հայտնում են դատարանից:
Մեզ հայտնի դարձավ, սակայն, որ վերացվել է այն խափանման միջոցը, որը Սարգսյանի նկատմամբ կիրառվել է նախաքննության փուլում գտնվող գործով, այլ ոչ թե դատարանում քննվող։
Հիշեցնենք, որ Դատախազությունը Հակակոռուպցիոն դատարանում Սարգսյանի վերաբերյալ քննվող երկու գործով նրա նկատմամբ բացակայելու արգելք խափանման միջոց ընտրելու միջնորդություններ էր ներկայացրել, սակայն երկու դատավորն էլ մերժել էին միջնորդությունները։ Դրանից հետո Սարգսյանը կանչվել էր Հակակոռուպցիոն կոմիտե, և նրան նոր մեղադրանք էր առաջադրվել ու խափանման միջոց ընտրվել բացակայելու արգելքը։
Factor TV-ի տեղեկություններով՝ այս որոշումը բողոքարկվել է Հակակոռուպցիոն դատարան, և դրա արդյունքում է, որ դատարանը պարտավորեցրել է վերացնել Սարգսյանի նկատմամբ ընտրված խափանման միջոց բացակայելու արգելքը։
