Սպասելի էր, որ Ադրբեջանի թիմը չի ժամանելու Հայաստան․ ՀԲՖ գլխավոր քարտուղար

Փետրվարի 5-ին կայացած վիճակահանությունից հետո հայտնի դարձավ, որ Ադրբեջանի թիմը չի մասնակցելու Երևանում անցկացվելիք բասկետբոլի Եվրոպայի մինչև 16 տարեկանների C դիվիզիոնի առաջնությանը։

Հայաստանի բասկետբոլի ֆեդերացիայի գլխավոր քարտուղար Արթուր Նազարյանը Factor TV-ի հետ զրույցում նշել է, որ իրադարձությունների այդպիսի զարգացումը սպասելի էր։

«Նախորդ տարվա դեկտեմբերին Հայաստանի բասկետբոլի ֆեդերացիան դիմել էր կառավարությանը և ամենաբարձր մակարդակով ստացել էր երաշխավորագիր, որ Հայաստանն ապահովելու է Ադրբեջանի պատանեկան հավաքականի անվտանգությունը։ Մենք էլ այդ երաշխավորագիրը ներկայացրել էինք ՖԻԲԱ Եվրոպային։ Բայց հետագայում Ադրբեջանը հրաժարվել է մասնակցությունից։ Մեզ համար դա ինչ-որ տեղ սպասելի էր, քանի որ խոսքը պատանեկան հավաքականների մասին է, և այդտեղ որոշում ընդունողները հիմնականում ծնողներն են։

Երբ 2 տարի առաջ Բաքվում անցկացվում էր 18 տարեկանների առաջնությունը, մենք չկարողացանք մեկնել, քանի որ բասկետբոլիստների ծնողները կտրականապես դեմ էին, և այդ հարցը նույնիսկ չհասավ լուրջ քննարկման»,- ասաց Արթուր Նազարյանը։

Հիշեցնենք, որ Ադրբեջանի հավաքականը չէր մասնակցել նաև 2025թ․ ամռանը Երևանում անցկացված բասկետբոլի Եվրոպայի մինչև 20 տարեկանների B դիվիզիոնի առաջնությանը։

Երևանը Եվրոպայի C դիվիզիոնի Մ16 առաջնությունը կընդունի հուլիսի 4-12-ը։ Հայաստանի Մ16 հավաքականն ընդգրկվել է B խմբում, որտեղ կմրցի Ջիբրալթարի, Անդորրայի, Մալթայի և Մոնակոյի թիմերի հետ։ A խմբում են Կոսովոյի, Ալբանիայի, Սան Մարինոյի և Մոլդովայի Մ16 հավաքականները։

Դավիթ Եղիազարյան