14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Ալեն Սիմոնյանը Ռոբերտ Քոչարյանից 1 մլն դրամ փոխհատուցում է պահանջում
Հասարակություն
06.02.2026 | 12:21
Ազգային ժողովի նախագահ Ալեն Սիմոնյանը հայցադիմում է ներկայացրել ՀՀ երկրորդ նախագահ Ռոբերտ Քոչարյանի դեմ։ Սիմոնյանը պահանջում է հրապարակային ներողություն խնդրել իրեն վիրավորելու համար և 1 մլն դրամ փոխհատուցում վճարել։
Ըստ հայցապահանջի՝ Քոչարյանի ներողության տեքստը պետք է հրապարակվի Ռոբերտ Քոչարյանի «Ֆեյսբուք» սոցիալական էջում՝ բոլորի համար հասանելի և տեսանելի եղանակով, առնվազն 5 աշխատանքային օր ժամկետով կամ անհնարինության դեպքում՝ առնվազն հինգ հազար տպաքանակ ունեցող տպագիր մամուլում հետևյալ բովանդակությամբ.
«29.01.2026թ.-ին իմ կողմից հրավիրված մամլո ասուլիսի ժամանակ կատարել եմ վիրավորական արտահայտություններ Ալեն Սիմոնյանի վերաբերյալ, ինչի համար ներողություն եմ խնդրում պարոն Սիմոնյանից»։
Բացի հայցային պահանջից, Սիմոնյանը պահանջում է նաև նախկին նախագահից հօգուտ իրեն բռնագանձել դատական ծախսերը 480 000 դրամը փաստաբանի վարձատրության գումարն է, իսկ 50 000դրամը՝ պետական տուրքը:
Հիշեցնենք՝ Ռոբերտ Քոչարյանն իր վերջին ասուլիսի ժամանակ, լրագրողի հարցին ի պատասխան անդրադարձել էր Ալեն Սիմոնյանի այն քննադատությանը, թե Քոչարյանի նախագահության տարիներին բանակը շատ վատ իրավիճակում է եղել։
«2019-ին տեսել եմ ու հիշում եմ կադրեր, երբ Նիկոլ Փաշինյանը չի կարողացել «ռաժոկը» կպցնի ավտոմատին: Խայտառակություն էր, գոնե մինչեւ այդտեղ գնալը մի փակ տեղում մի քանի անգամ փորձեր: Այդպիսի ղեկավար ունենք, չեմ զարմանում՝ պարտվել ենք: Եթե պետք է բանակի մարտունակությունը Ալեն Սիմոնյանը գնահատի, էդ ուր ենք հասել: Ի՞նչ է նա հասկանում բանակից: Կասկածում եմ՝ նույնիսկ նորմալ ծառայել է: Որովհետև այդպիսի լպրտուն մարդիկ չեն կարող նորմալ ծառայած լինեն»։
Ավելի ուշ, Ալեն Սիմոնյանը տեսանյութ էր հրապարակել, հայտարարելով, որ Ռոբերտ Քոչարյանը պետք է հրապարակավ ներողություն խնդրի վիրավորանքների համար։
Ռոզա Վարդանյան
