ԱՄՆ փոխնախագահ Ջեյ Դի Վենսը Հայաստան կգա Ձմեռային օլիմպիական խաղերի բացումից հետո

ԱՄՆ փոխնախագահ Ջեյ Դի Վենսը մեկնում է արտասահմանյան ուղևորության, որը համատեղում է դիվանագիտությունն ու սպորտը՝ գլխավորելով նախագահ Դոնալդ Թրամփի պատվիրակությունը 2026 թվականի Ձմեռային օլիմպիական խաղերին։ Այնուհետև նա կանգ կառնի Հայաստանում և Ադրբեջանում՝ ի նշան անցյալ տարի Սպիտակ տան կողմից միջնորդված խաղաղության համաձայնագրի աջակցության, գրում է AP-ն։

Ուրբաթ Ձմեռային օլիմպիական խաղերի բացման արարողության ժամանակ փոխնախագահը կգլխավորի ԱՄՆ պատվիրակությունը, որի կազմում են նրա կինը՝ Ուշա Վենսը, պետքարտուղար Մարկո Ռուբիոն և Իտալիայում ԱՄՆ դեսպան Թիլման Ֆերտիտտան: Պատվիրակության կազմում կլինեն նաև նախկին օլիմպիական ոսկե մեդալակիրներ, այդ թվում՝ հոկեյիստուհի քույրեր Ժոսլին Լամուրյո-Դևիդսոնը և Մոնիկ Լամուրյո-Մորանդոն,  չմշկորդ Ապոլո Օնոն և գեղասահորդ Էվան Լիսաչեկը։

Իտալիայից Վենսը կուղևորվի Հայաստան և Ադրբեջան։ ԱՄՆ նախագահ Դոնալդ Թրամփը նրան հանձնարարել է այստեղ զարգացնել համաձայնագիրը, որը նպատակ ունի վերջ դնել երկու երկրների միջև երկարամյա հակամարտությանը։

AP-ն գրում է, որ խաղաղության համաձայնագիրն ամրապնդում է ԱՄՆ-ի դիրքերը տարածաշրջանում այն ​​ժամանակ, երբ Ռուսաստանի ազդեցությունը նվազում է: Երկու նախկին խորհրդային հանրապետությունները՝ Հայաստանը և Ադրբեջանը, համաձայնության են եկել վերաբացել հիմնական տրանսպորտային ուղիները և ամրապնդել համագործակցությունը Միացյալ Նահանգների հետ էներգետիկայի, տեխնոլոգիաների և տնտեսության ոլորտներում։

Համաձայնագիրը նաև նախատեսում է ստեղծել խոշոր տարանցիկ միջանցք, որը կոչվում է «Թրամփի ճանապարհ միջազգային խաղաղության և բարգավաճման համար»: Ակնկալվում է, որ այն կկապի Ադրբեջանը և նրա ինքնավար Նախիջևանը, որոնք բաժանված են Հայաստանի տարածքի 32 կիլոմետր լայնությամբ հատվածով:

Թարգմանությունը՝ Էմմա Չոբանյանի