Արշակ արքեպիսկոպոս Խաչատրյանի կալանքը երկու ամսով երկարացվեց․ քրոջ երեխաները կարող են տեսակցել նրան

Մայր Աթոռ Սուրբ Էջմիածնի դիվանապետ Արշակ արքեպիսկոպոս Խաչատրյանի կալանքի ժամկետը ևս երկու ամսով երկարաձգվել է։ Այս մասին Երևանի առաջին ատյանի ընդհանուր իրավասության քրեական դատարանի բակում լրագրողների հետ զրույցում ասաց նրա պաշտպան Արսեն Բաբայանը։

«Ինչպես գիտեինք ի սկզբանե, երկու ամսով երկարացվեց կալանքը, սահմանափակվեցին տեսակցությունները։ Միակ ուրախալի լուրն այն է, որ դատարանը բավարարեց մեր միջնորդությունը՝ քրոջ երեխաներին տեսակցելու մասով։ Միայն նրանք կկարողանան այցելել»,- նշեց փաստաբանը։

Բաբայանի խոսքով՝ որոշման ամբողջական տեքստը դեռ չեն ստացել։

«Որոշումը հրապարակվել է, բայց գրավոր տարբերակը դեռ չենք ստացել։ Երկու-երեք ժամվա ընթացքում կվերցնենք, կկարդանք ու կհասկանանք՝ ինչ են գրել»,- ասաց Բաբայանը։

Պաշտպանը նաև տեղեկացրեց, որ քննիչը հերքել է, թե գործով որևէ ապացույց է կորել։ Ի դեպ, Բաբայանը հայտնեց, որ բողոքարկելու են դատարանի որոշումը։

Հիշեցնենք, որ Արշակ արքեպիսկոպոս Խաչատրյանին դեկտեմբերի 4-ին Քննչական կոմիտե էին հրավիրել՝ նրան վերագրվող տեսանյութի գործով հարցաքննության, սակայն հարցաքննության ավարտից հետո, երբ արդեն փաստաբանի հետ ցանկացել են դուրս գալ շենքից, նրանց դիմավորել են ԱԱԾ աշխատակիցներն ու հայտնել, որ քննիչի որոշում ունեն հոգևորականին ձերբակալելու վերաբերյալ:

Արշակ արքեպիսկոպոս Խաչատրյանին մեղադրում են իրացնելու նպատակով թմրանյութերի ապօրինի շրջանառության մեջ: Նշվում է, որ արքեպիսկոպոսին վերագրվող դեպքը տեղի է ունեցել 2018 թվականին Ամենայն հայոց կաթողիկոս Գարեգին Բ-ի դեմ բողոքի ակցիայի ժամանակ: Ըստ մեղադրանքի՝ ակցիայի մասնակիցներից մեկին վարկաբեկելու նպատակով Արշակ արքեպիսկոպոսը ինչ-որ մեկին հրահանգել է թմրանյութ գցել նրա ուսապարկը:

Արփի Հակոբյան