Գերագույն խորհրդի անդամ եպիսկոպոսներին ՔԿ ներկայանալու ծանուցագրեր են տրվել. փաստաբան

Փաստաբան Արա Զոհրաբյանի փոխանցմամբ՝ այսօր առավոտվանից ոստիկանության միջոցով ծանուցագրեր են հանձնվում Գերագույն Հոգևոր Խորհրդի ադնամ եպիսկոպոսներին՝ որպես մեղադրյալ այսօր Քննչական կոմիտե ներկայանալու համար։

Ըստ տեղեկությունների՝ մի քանի եպիսկոպոս արդեն ստացել է համապատասխան ծանուցագիրը։ Ըստ փաստաբանի՝ եպիսկոպոսները մեղադրվում են դատական ակտի կատարմանը խոչընդոտելու արարքի կատարման մեջ։

Հիշեցնենք, որ դատական ակտը չկատարելու դեպքի առնչությամբ, այն է՝  Տեր Գևորգ եպիսկոպոս Սարոյանին, մինչև գործով եզրափակիչ դատական ակտ կայացնելը, կարգալույծ հռչակելը, Հայ առաքելական եկեղեցու դեմ  Քննչական կոմիտեն քրեական վարույթ էր նախաձեռնել։

Փաստաբանի գնահատմամբ՝ տեղի ունեցողը հերթական միջամտությունն է Եկեղեցու ներքին գործերին, որի հիմնական նպատակը Եպիսկոպոսաց ժողովի անցկացմանը խոչընդոտելն է։

Արա Զոհրաբյանը նաև նշել է, որ ցավում է՝ Քննչական կոմիտեի ղեկավարի գործողությունների համար, որոնք, իր խոսքով, շեղվում են կառույցի առաքելությունից և բարդ իրավիճակի մեջ են դնում համակարգում աշխատող բազմաթիվ բարեխիղճ քննիչների։

Քննչական կոմիտեն այս տեղեկությունը դեռևս չի մեկնաբանել։

Հիշեցնենք, որ ս․թ․ հունվարի 10-ին Գարեգին Բ կաթողիկոսը Գևորգ եպիսկոպոս Սարոյանին ազատել էր թեմակալ առաջնորդի պաշտոնից։

Հունվարի 16-ին հայտնի դարձավ, որ Գևորգ եպիսկոպոս Սարոյանը հայց էր ներկայացրել Մայր Աթոռի դեմ՝ պահանջելով իրեն վերականգնել պաշտոնում։

Ապա հաղորդվեց, որ Արմավիրի մարզի առաջին ատյանի ընդհանուր իրավասության դատարանի որոշմամբ Գևորգ եպիսկոպոս Սարոյանը կվերականգնվի Մասյացոտնի թեմի առաջնորդի պաշտոնում՝ մինչև վերջնական դատական ակտի հրապարակումը:

Հունվարի 27-ին Մայր Աթոռ Սուրբ Էջմիածնից հայտնեցին, որ Տեր Գևորգ եպիսկոպոս Սարոյանը կարգալույծ է հռչակվել։