19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
ՀՖՖ նոր գլխավոր քարտուղար․ Խնդիրներ կան ինչպես բոլոր բնագավառներում, այնպես էլ ֆուտբոլում
30.01.2026 | 12:29
Հայաստանի ֆուտբոլի ֆեդերացիայի նորանշանակ գլխավոր քարտուղար Էդգար Պետրոսյանը խոսել է իր նշանակման, առաջիկա նպատակների և միջազգային գործընկերների հետ սպասվող աշխատանքների մասին։
«Ուզում եմ շնորհակալություն հայտնել բոլոր այն գործընկերներին, որոնք վստահեցին ինձ Հայաստանի ֆուտբոլի ֆեդերացիայի գլխավոր քարտուղարի պաշտոնը։ Շատ պատասխանատու պաշտոն է և անելու եմ ամեն բան՝ հանուն հայկական ֆուտբոլի, հանուն մեր ակումբների և հավաքականի։
Խնդիրներ կան ինչպես բոլոր բնագավառներում, այնպես էլ ֆուտբոլում, ու խնդիրները տարբեր են։ Ֆուտբոլի ֆեդերացիան փորձում է խնդիրները կարգավորել, շտկել թե՛ օրակարգային, և թե՛ ոչ օրակարգային ձևաչափով։ Ես էլ իմ հերթին փորձելու եմ օգնել, որպեսզի այդ խնդիրներն է՛լ ավելի արագ լուծում ստանան։
Շուրջ երկու տարի աշխատել եմ ֆուտբոլի ֆեդերացիայում՝ որպես մրցումների բաժնի ղեկավար։ Այդ աշխատած տարիներին հասցրել եմ բավականին խորքից ճանաչել և իմանալ մանկապատանեկան ֆուտբոլի խնդիրները, Fastex Պրեմիեր լիգայի, Առաջին խմբի մրցումների առկա խնդիրները և վստահ եմ, որ գլխավոր քարտուղարի պաշտոնը կօգտագործեմ, որպեսզի խնդիրներն ավելի արագ լուծում ստանան։
Հատկանշական է, որ Հայաստանի ֆուտբոլի պատմության մեջ առաջին անգամ ունենք ՈՒԵՖԱ-ում գործկոմի անդամ՝ հանձինս պարոն Մելիքբեկյանի։ Եվ շատ կարևոր է նաև նշել, որ ունենք բավականին մեծ թվով աշխատակիցներ, որոնք ամենօրյա ռեժիմով շփվում են ՈՒԵՖԱ-ի մեր գործընկերների հետ։ Իսկ ինչ վերաբերում է գլխավոր քարտուղարի պաշտոնին՝ փորձելու եմ անել առավելագույնը, որպեսզի այդ հարաբերությունները բարձրանան է՛լ ավելի բարձր մակարդակի»,- ասել է ՀՖՖ գլխավոր քարտուղարը։
Էդգար Պետրոսյանը հունվարի 23-ին ՀՖՖ գլխավոր քարտուղար էր նշանակվել ֆեդերացիայի Գործադիր կոմիտեի հերթական նիստում։ Վերջին տարիներին այդ պաշտոնը զբաղեցնում էր Արթուր Ազարյանը, դրանից առաջ՝ ՀՖՖ նախագահ Արմեն Մելիքբեկյանը։
