01.04.2026 | 23:17
ԵՄ առաքելության գործունեությունը կարևոր է Հայաստանի քաղաքացիների համար. ՀՀ նախագահն ընդունել է Սատու Կոյվուին
Գորիսում նռնակի պայթյունից վիրավորված քաղաքացին ի վիճակի չէ հարցաքննվել
Հասարակություն
26.01.2026 | 19:30
Գորիսում երեկ տեղի ունեցած միջադեպին ականատես քաղաքացին տուժող է ճանաչվել։ Այս մասին Factor.am-ին հայտնեց ՔԿ մամուլի քարտուղար Կիմա Ավդալյանը։
Միջադեպին ներկա 30-ամյա քաղաքացին Գորիսի քաղաքապետ Առուշ Առուշանյանի վարորդի ընկերն է։ Այս մասին մեզ հայտնել էր Առուշանյանի հայրը՝ Գագիկ Առուշանյանը։ Քաղաքացին վնասվածքներ էր ստացել նռնակի պայթյունի հետևանքով և տեղափոխվել Գորիսի ԲԿ։
Բուժկենտրոնի տնօրեն Դավիթ Մաշուրյանը Factor TV-ին հայտնեց, որ վիրավորված քաղաքացին երեկոյան տեղափոխվել է Երևանի Գրիգոր Լուսավորիչ ԲԿ, վիճակը գնահատվել է ծանր կայուն։ Այս բուժհաստատությունից, սակայն, քաղաքացու վիճակի վերաբերյալ որևէ տեղեկություն չտրամադրեցին՝ վկայակոչելով բժշկական գաղտնիքը։ Մեր տեղեկություններով՝ տուժածն ի վիճակի չէ հարցաքննվել։
ՆԳՆ պաշտոնական հաղորդագրության համաձայն՝ Գորիսում կենցաղային հարցերի շուրջ տեղի է ունեցել վիճաբանություն, ինչի ընթացքում 45-ամյա Վարուժան Յոլյանի ձեռքի նռնակը պայթել է: Վարուժան Յոլյանը և 38-ամյա Արեն Յոլյանը մահացել են։
Գագիկ Առուշանյանը մեզ հայտնել էր, որ մահացած քաղաքացիները հորեղբոր տղաներ են, իսկ վեճը ծագել է հողի հարցի շուրջ անհամաձայնությունից, որի շուրջ ազգականները մի քանի անգամ վեճի են բռնվել և տևական ժամանակ համաձայնության չեն կարողացել գալ։
Առուշանյանի հոր խոսքով՝ երբ Վարուժան Յոլյանը հանել է նռնակը, իր որդու վարորդը՝ Արեն Յոլյանը, փորձել է կանխել՝ բռնելով նրա ձեռքը, բայց պայթյուն է տեղի ունեցել, և երկուսն էլ մահացել են։ Առուշանյանի խոսքով՝ որդին միջադեպի հետ կապ չունի, իսկ դեպքի պահին եղել է մարզասրահում։
Դեպքի առթիվ ՔԿ-ում քրեական վարույթ է նախաձեռնվել։
Արփի Հակոբյան
