Լրագրողների դեմ նվաստացուցիչ մոտեցումներով աչքի են ընկել ԱԺ նախագահը, ՔՊ-ականներ,Գյումրիի քաղաքապետը. ՏԵՍԱՆՅՈՒԹ

2025-ին գրանցվել է լրագրողների նկատմամբ 45 վիրավորանք ու խոչընդոտ, որոնցից 33-ը՝ իշխանության ներկայացուցիչների կողմից։ Այս մասին այսօր հրավիրված մամուլի ասուլիսի ժամանակ ասաց Խոսքի ազատության պաշտպանության կոմիտեի նախագահ Աշոտ Մելիքյան։

«Այդպիսի վերաբերմունքով աչքի են ընկել նաև առաջին դեմքերը․ Ազգային ժողովի նախագահ Ալեն Սիմոնյանը, պատգամավորներ, Անդրանիկ Քոչարյանի և Վիգեն Գաբրիելյանի մասին է խոսքը։ Նաև պետք է հիշեցնեմ, որ Տիգրան Ավինյանն է այդպիսի հռետորաբանությամբ հանդես եկել, էլ չենք խոսում Գյումրիի քաղաքապետ Վարդան Ղուկասյանի մասին։ Պետք է նշեմ 15 ֆիզիկական բռնությունների փաստերի մասին, որոնցից յոթը իրավապահների կողմից է կիրառվել տարբեր զանգվածային միջոցառումների և խորհրդարանում տեղի ունեցած իրադարձությունների ժամանակ»,- նշեց Մելիքյանը՝ հավելելով, որ մեկ դեպքում կատարողը առայժմ անհայտ է։

«Սա այն դեպքն է, երբ լրագրող Հակոբ Կարապետյանին դիմակավորված անձը ֆիզիկական բռնության է ենթարկել, և ըստ մեր հարցման պատասխանի՝ իրավապահներից առայժմ այդ անձը հայտնաբերված չէ, բայց նաև պետք է ասեմ, որ նախաքննության գործողություններում այսպես նկատելի առաջընթաց չկա, սա շատ մտահոգիչ է։ Կարծում եմ, որ իրավապահ մարմինները շատ ավելի սկզբունքային պետք է գտնվեն և գործողությունները ակտիվացնեն այդ անձին հայտնաբերելու և միգուցե նաև պատվիրատուին, եթե ենթադրյալ պատվիրատուին հայտնաբերեն և պատասխանատվության ենթարկեն»,- ընդգծեց Աշոտ Մելիքյանը։

Մանրամասները՝ տեսանյութում։