Իրանի քաղաքացիները դարձյալ բողոքի ակցիա կիրականացնեն Երևանում 

Իրանի քաղաքացիներն այսօր ևս մտադիր են բողոքի ակցիա իրականացնել Հայաստանում Իրանի դեսպանության հարակից տարածքում: Նրանք հավաք անցկացնելու վերաբերյալ իրազեկում են ներկայացրել Երևանի քաղաքապետարան:

Նշենք, որ հունվարի 17-ին Իրանի քաղաքացիների բողոքի ակցիան խոչընդոտվել էր. ՆԳՆ ոստիկանությունը նրանց թույլ չէր տվել բողոքի երթ անցկացնել ՀՀ-ում Իրանի դեսպանատնից դեպի Կապույտ մզկիթ։

Ակցիայի մասնակիցներից Էսան Սահրադիանը Factor.am-ի հետ զրույցում նշել էր, որ ՀՀ-ում իրենց խաղաղ երթը խոչընդոտվել է Իրանի դեսպանի վերջին հայտարարությունների պատճառով։

Հիշեցնենք՝ ՀՀ-ում Իրանի դեսպան Խալիլ Շիրղոլամին դեսպանատան դիմաց անցկացվող ցույցերի վերաբերյալ հայտարարել էր, թե Հայաստանը իրենց դեմ գործողությունների կենտրոն է դառնում. «Թեհրանում ձևավորվում է պատկերացում, որ Հայաստանը դառնում է մի կենտրոն Իրանի դեմ թշնամաբար տրամադրված ուժերի գործողությունների համար»:

Այս հայտարարությանն անդրադարձել են թե´ ՀՀ ՆԳՆ-ն, թե´ վարչապետը։ Նիկոլ Փաշինյանը լրագրողների հետ ճեպազրույցում նշել էր․ «Մենք Իրանի Իսլամական Հանրապետության մեր գործընկերների հետ շփումներում բազմիցս ասել ենք, որ Հայաստանի Հանրապետությունը Իրանի պետական անվտանգության դեմ միջոցներ չի ձեռնարկի, և նույնն ակնկալում ենք Իրանի Իսլամական Հանրապետությունից։ Հայաստանում, ընդհանրապես, 2018-ից էս կողմ երբեք, ոչ մի տեղ հանրահավաք չի արգելվել, և մենք չենք կարող առանձին վերցրած մի դեպքում այլ կերպ վարվել, որովհետև դա արդեն իրողություն է»,- հայտարարել էր Նիկոլ Փաշինյանը:

Վարչապետի այս հայտարարությունից երկու օր անց Իրանի դեսպանատան մոտ ակցիա իրականացնող յոթ քաղաքացի բերման էր ենթարկվել ոստիկանության Արաբկիրի բաժին:

Ոստիկանությունից մեկնաբանել էին, որ երթն արտոնված չէ, իսկ ավելի ուշ պարզ դարձավ, որ քաղաքապետարանը չեղարկել է երթ անցկացնելու վերաբերյալ թույլտվությունը: Թե որն էր պատճառը` նշված չէր: Իսկ իրանցիները նշել էին, որ ըստ քաղաքապետարանի հիմնավորման` պատճառը խցանումներ չառաջացնելն է:

Արփի Հակոբյան