23.09.2026 | 23:23
Վթարվել է Արզական-Քանաքեռ-Զովունի ջրատարը
«Չեմ հավատում, որ այս ամենն իրական է»․ Վիգեն Էուլջեքչյանի կինը չկարողացավ զսպել հուզմունքն օդանավակայանում
Հասարակություն
15.01.2026 | 11:26
Ադրբեջանից Հայաստանին փոխանցված Վիգեն Էուլջեքջյանի կինը Հայաստանում է, օդանավակայանում լրագրողներին տեսնելով չկարողացավ զսպել արցունքները։
«Հիմա ես ուզում եմ տեսնել Վիգենին, սա ամենակարևոր բանն է ինձ համար։ Հետո կմտածեմ մնացած ամեն ինչի մասին: Չափազանց ուրախ եմ, չեմ հավատում, որ այս ամենն իրական է»,-լրագրողների հետ զրույցում նշեց Լինդան։
Ավելի վաղ հայտնի էր դարձել, որ Վիգենի որդին պատրաստվում է ամուսնանալ։ Լինդան լրագրողներին ասաց, որ որդին պսակադրվելու է, երբ Վիգենը Լիբանան վերադառնա։
Օդանավակայանում Լինդային դիմավորելու էր եկել նաև Ազգային ժողովի պատգամավոր Հայկ Սարգսյանը․ «Տեղեկացանք, որ Հայաստանում դիմավորող այս պահին, ոնց որ, չկա, քանի որ իրենք Հայաստանում մշտական բնակության մեջ չեն ու որոշեցինք գանք դիմավորենք, իրեն տեղեկացրեցինք, շատ ուրախացել է, հիմա սպասում ենք, որ իրեն դիմավորենք և միասին արդեն գնանք «Մուրացան» հոսպիտալ, որտեղ պահվում են մեր տղաները»։
Հիշեցնենք՝ հունվարի 14-ին Նիկոլ Փաշինյանը ֆեյսբուքում հայտնեց, որ Գևորգ Սուջյանը, Դավիթ Դավթյանը, Վիգեն Էուլջեքջյանը և Վագիֆ Խաչատրյանը Հակարիի կամրջով Ադրբեջանի Հանրապետության համապատասխան մարմինների ներկայացուցիչների կողմից հանձնվել են Հայաստանի Հանրապետության համապատասխան մարմինների ներկայացուցիչներին և հիմա գտնվում են ՀՀ տարածքում։
«Նրանք նախնական զննությամբ առողջական խնդիրներ չունեն։ Վագիֆ Խաչատրյանի առողջական վիճակը նախնական գնահատվում է բավարար։ Նրանք տեղափոխվում են Երևան»,- գրել է Փաշինյանը։
Եվգենյա Համբարձումյան
