ԱԱԾ ծառայողին տրված արժեքավոր նվերի մասին տեղեկությունը՝ «պետական գաղտնիք»

Վարչապետ Նիկոլ Փաշինյանը հունվարի 7-ին որոշում էր ստորագրել Ազգային անվտանգության ծառայության ռազմաբժշկական վարչության պետի տեղակալ-պոլիկլինիկայի պետի պարտականությունների ժամանակավոր կատարող, փոխգնդապետ Թամարա Մելիքյանին արժեքավոր նվերով պարգևատրելու մասին։

Factor TV-ն հարցմամբ դիմել էր վարչապետի աշխատակազմ՝ պարզելու, թե ինչ նվերի մասին է խոսքը, որքան է դրա արժողությունը և ինչու է որոշվել այն Թամարա Մելիքյանին հանձնել։

Հարցման պատասխանում նշվել է՝ արժեքավոր նվերը ձեռք է բերվել վարչապետի արարողակարգային միջոցառումների շրջանակներում՝ պաշտոնատար անձանց արարողակարգային ծախսերի հաշվին։

««Գնումների մասին» ՀՀ օրենքի համաձայն՝ պետական գաղտնիք պարունակող գնումների պլանում ներառվում են ազգային անվտանգության ապահովման, «Հատուկ պետական պաշտպանության ենթակա անձանց անվտանգության ապահովման մասին» Հայաստանի Հանրապետության օրենքի 5-րդ հոդվածի 2-րդ մասով նախատեսված պաշտոնատար անձանց արարողակարգային ծախսերի, (. . .) ապահովման համար անհրաժեշտ ապրանքները, աշխատանքները և ծառայությունները։ Ըստ այդմ՝ Ձեր կողմից հայցվող տեղեկատվությունը հրապարակման ենթակա չէ»,-հայտնել են վարչապետի աշխատակազմից։

Պատասխանում չի նշվել նաև, թե ինչ սկզբունքով է պարգևատրվել հենց Թամարա Մելիքյանը․ «Արժեքավոր նվերով պարգևատրվել է Ազգային անվտանգության մարմինների աշխատողի օրվա կապակցությամբ, բարեխիղճ և արդյունավետ աշխատանքի համար՝ Ազգային անվտանգության ծառայության տնօրենի միջնորդության հիման վրա»։

Եվգենյա Համբարձումյան