03.07.2026 | 11:11
«Արտյոմին ու Գոռին չոտկի կտաս, մնացածին՝ 20 պակաս ես տալում, հարցը լուծվում ա»․ ՀԿԿ ձայնագրություն
ՀԱՊԿ գլխավոր քարտուղարի պաշտոնի համար երեք թեկնածություն է դիտարկվում. Ուշակով
Քաղաքականություն
07.11.2018 | 18:25
Հավաքական անվտանգության պայմանագրի կազմակերպության (ՀԱՊԿ) անդամ պետությունների ղեկավարները նոյեմբերի 8-ին Աստանայում կայանալիք գագաթնաժողովում կքննարկեն Կազմակերպության նոր գլխավոր քարտուղարի հարցը: ՏԱՍՍ-ի փոխանցմամբ՝ այս մասին լրագրողներին ասել է ՌԴ նախագահի օգնական Յուրի Ուշակովը:
«Գագաթնաժողովը նախ կանցկացվի նեղ կազմով, կքննարկվի շատ կարևոր հարց՝ ՀԱՊԿ նոր գլխավոր քարտուղարի մասին»,- ասել է Ուշակովը:
Նրա խոսքով՝ հարցը կքննարկվի փակ ռեժիմով: «Երեք հնարավոր տարբերակ է դիտարկվում. կա՛մ մինչև 2020 թվականի մայիս գլխավոր քարտուղարի պարտականությունների ժամանակավոր կատարում գլխավոր քարտուղարի տեղակալ Սեմերիկովի կողմից (ՌԴ ներկայացուցիչ), կա՛մ Բելառուսի ներկայացուցչի ընտրություն, քանի որ այբբենական կարգով հաջորդը Բելառուսն է: Երրորդ տարբերակը, որի հարցում պնդում է հայկական կողմը, մինչև 2020 թվականի մայիս Հայաստանի ներկայացուցիչ ընտրելն է»,- ասել է ՌԴ նախագահի օգնականը՝ հավելելով, որ առայժմ դժվար է կանխատեսել, թե ի՞նչ որոշում կկայացնեն երկրների առաջնորդները:
Հիշեցնենք, որ 2017 թվականի մայիսից ՀԱՊԿ գլխավոր քարտուղարի պաշտոնը զբաղեցնում էր Հայաստանի ներկայացուցիչ Յուրի Խաչատուրովը: 2018-ի հուլիսին նրան Մարտի 1-ի գործով մեղադրանք առաջադրվեց, իսկ օգոստոսի 1-ին հայկական կողմը Խաչատուրովին ՀԱՊԿ գլխավոր քարտուղարի պաշտոնից հետկանչի գործընթաց նախաձեռնեց: Հոկտեմբերի 30-ին նրա լիազորությունների վաղաժամ դադարեցման մասին որոշումն ուժի մեջ մտավ:
