Ով է Մալաթիա-Սեբաստիա վարչական շրջանի ամանորյա ձևավորման «անհաջող տենդեր շահողը» 

Մալաթիա-Սեբաստիա վարչական շրջանի ամանորյա զարդարանքը դժգոհություններ է առաջացրել համայնքի բնակիչների շրջանում։ Նրանցից մեկը ֆեյսբուք սոցիալական ցանցում դժգոհել էր, որ Մալաթիա-Սեբաստիայի տոնական զարդարանքն անշուք է։ Ի պատասխան վարչական շրջանի ղեկավար Ռոմիկ Մխիթարյանը գրել էր․

«Այս տարվա տենդեր շահողը շատ անհաջող էր»։

Ռոմիկ Մխիթարյանը Factor TV-ի հետ զրույցում հորդորեց նայել վարչական շրջանի ֆեյսբուքյան էջում հրապարակված տեսանյութերը, ասաց՝ հիմա զարդարանքն էլ, լուսավորությունն էլ գեղեցիկ են։ Թաղապետից հետաքրքրվեցինք՝ ինչպես է ընտրվել այդ ընկերությունը, արդյոք նախկինում ունեցել է փորձառություն, ինչին ի պատասխան արձագանքեց․

«Մի հատ նայեք, ֆեյսբուքով տարածված է, ամբողջ լուսավորությունը երևում ա։ Տենդեր շահողներին ես չեմ ընտրում, ընդհանրապես կապ չունեմ դրա հետ»։

Factor TV-ն գնումների պետական համակարգից տեղեկացավ, որ Մալաթիա-Սեբաստիա վարչական շրջանի ամանորյա զարդարանքն իրականացրել է «ՆԱՐԵԿ ԴԱՎԹՅԱՆ ԷԴՎԱՐԴԻ ԱՁ»-ն, պայմանագրի արժեքը 12 միլիոն դրամ է։

Անհատ ձեռնարկատերը պետական գնումների սկսել է մասնակցել այս տարվանից։ Առաջին պայմանագիրը կնքել է 2025 թվականի նոյեմբերին։ Բացի Մալաթիա-Սեբաստիա վարչական շրջանի ամանորյա զարդարանքից, ընկերությունը 18 միլիոն դրամ արժողությամբ պայմանագիր է կնքել Դիլիջանի քաղաքապետարանի հետ։

12 միլիոն դրամ գումարի դիմաց ԱՁ-ն պարտավորվել է ձևավորել վարչական շրջանը, մասնավորապես, Սեբաստիա, Զ․ Անդրանիկ, Րաֆֆու և Շերամ փողոցները՝ «ապահովելով գեղեցիկ, գունազարդ և տոնական տեսք»։ Ձեռնարկատերը նաև պարտավորվել է վերանորոգել առկա դեկորները, նախորդ տարվանից ձևավորման համար առկա գույքը։ Ծառայությունների գինը ներառում է տեղադրումը, ապամոնտաժումը, ապամոնատժումից հետո գույքը համայնքապետարանի պահեստ տեղափոխելը։

Երևանի քաղաքապետ Տիգրան Ավինյանը տարեվերջյան իր ամփոփոիչ ասուլիսում լրագրողի հարցին ի պատասխան նշել էր, որ տեղյակ չէ տոնական զարդարանքի հետ կապված դժգոհություններից, առաջին անգամ է լսում, բայց խոստացավ լուծումներ տալ։

Արփի Հակոբյան