Սամվել Կարապետյանը դատարանում պարտվել է Նազելի Բաղդասարյանին

Lոռու մարզի ընդհանուր իրավասության քաղաքացիական դատարանը, դատավոր Նանե Սահակյանի նախագահությամբ, մերժել է գործարար Սամվել Կարապետյանի հայցն ընդդեմ վարչապետ Նիկոլ Փաշինյանի մամուլի քարտուղար Նազելի Բաղդասարյանի` հրապարակայնորեն ներողություն խնդրելու, հերքում տարածելու և 9.000.000 դրամ որպես փոխհատուցում տրամադրելու վերաբերյալ: Factor TV-ի հետ զրույցում Բաղդասարյանի շահերը ներկայացնող փաստաբան Արման Ներսիսյանը նշեց՝ վճիռը դեռ օրինական ուժի մեջ չի մտել։

Հայցը ներկայացվել էր Նազելի Բաղդասարյանի հունիսի 17-ի ֆեյսբուքյան գրառման համար. «Ինքնակոչ սրբադասվածը (որի պատկերը Մայր Աթոռի գանձարանում է) հյուսիսից ստացած դասական «մետոդիչկայով» որոշել է հայաստանյան ներքին օրակարգերին խառնվել, թե բա՝ «մենք մեր ձևով ենք միջամտելու»։

Չեմ հասկանում՝ հովհարային անջատու՞մ է, թե՞ թույլ միացում վերջինիս մոտ։ Ամեն դեպքում՝ հողանցում արեք, ոտքերը գետնից կտրվել են։

Հայաստանը ծայրագավառ դարձնելու սրանց փորձերն ապարդյուն են։

Հ.Գ. Հայաստանի պետականության դեմ մարտնչող տաշիրիսամոների, արաաբրահամյանների և պիպոյահպատակ արբանյակներն ակտիվացել են։

Ինքնալուստրացիա մինչև վերջ։

Խայտառակվե՛ք, կանգ մի առեք»։

Դատարանը գտել է, որ Նազելի Բաղդասարյանի այս գրառման մեջ բացակայում են վիրավորանքն ու զրպարտությունը։

Factor TV-ի հետ զրույցում Կարապետյանի փաստաբան Կարեն Մարգարյանը նշեց, որ վերաքննիչ բողոք են ներկայացնելու, դատարանի գնահատականների հետ համաձայն չեն։

Եվգենյա Համբարձումյան