27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Առողջապահության նախարարությունը հորդորում է տոնական օրերին պահպանել սննդային անվտանգության կանոնները
30.12.2025 | 14:32
Հայաստանի առողջապահության նախարարությունը զգուշացնում է, որ ամանորյա տոնական օրերին սննդային գործոնով պայմանավորված՝ վարակիչ հիվանդությունների և թունավորումների առաջացման ռիսկը զգալիորեն բարձրանում է։
Նախարարության տարածած հաղորդագրության մեջ նշվում է, որ տոնական օրերին հաճախ օգտագործվում են երկար ժամանակ և ոչ պատշաճ պայմաններում պահված, բազմակի տաքացված կերակրատեսակներ, ինչպես նաև իրար հետ ոչ համատեղելի մթերքներ, որոնք կարող են մարսողական համակարգի տարբեր խանգարումների պատճառ դառնալ։
«Սննդային գործոնով պայմանավորված վարակիչ հիվանդություններից և թունավորումներից խուսափելու համար Առողջապահության նախարարությունը խորհուրդ է տալիս գնումներ կատարել միայն խանութներից և խուսափել անկազմակերպ վաճառքի կետերից, ուշադրություն դարձնել մթերքների պահպանման պայմաններին, պիտանիության ժամկետին և արտաքին տեսքին, աղցանները, մսային կերակրատեսակները և դոնդողը պատրաստել տանը՝ փոքր քանակներով և հիգիենայի կանոնների պահպանմամբ, պատրաստի կերակրատեսակներ գնելիս ստուգել դրանց պատրաստման և իրացման ժամկետները, պահպանման պայմաններն ու ջերմաստիճանը, կիսապատրաստված մթերքները օգտագործելուց առաջ պարտադիր ենթարկել կրկնակի ջերմային մշակման, խմորեղենը և կրեմով տորթերը սառնարանում պահել առավելագույնը երեք օր, սնունդ պատրաստելուց առաջ և հում մթերքին դիպչելուց հետո պարտադիր լվանալ ձեռքերը, հում և պատրաստի մթերքների համար օգտագործել առանձին տախտակներ և դանակներ, մանրազնին լվանալ կանաչին, մրգերն ու բանջարեղենը, խուսափել տնային պայմաններում պատրաստված պահածոների օգտագործումից, իսկ անհրաժեշտության դեպքում դրանք եռացնել 15–20 րոպե, չգնել և սննդում չօգտագործել անհայտ ծագման, չստուգված սնկեր։
Առողջապահության նախարարությունը նաև նշում է, որ մարսողության խանգարումների, սրտխառնոցի կամ որովայնային ցավերի դեպքում անհրաժեշտ է անհապաղ դիմել բժշկի»,- ասված է հաղորդագրությունում։
