22.12.2025 | 19:54
Փաշինյանը Պուտինի հետ խոսել է «Թրամփի երթուղու» կառուցման շուրջ ԱՄՆ-ի հետ բանակցությունների մասին
273 մլն դրամի «հրատապ» գնում՝ աշխատանքների փաստացի մեկնարկից ամիսներ անց
Հասարակություն
22.12.2025 | 18:20
Երևանի քաղաքապետարանը դեկտեմբերի 18-ին «հրատապ» կարգով մեկ անձից 273 մլն դրամի գնում է իրականացրել մի ճանապարհաշինարարական աշխատանքի համար, որն իրականում մեկնարկել է առնվազն 3 ամիս առաջ։ Պայմանագիրը կնքվել է «Արհովշին» ՍՊ ընկերության հետ։
Դեռ սեպտեմբերի 18-ին քաղաքապետարանը հայտարարել էր, որ Նուբարաշեն վարչական շրջանի 9-րդ փողոցից դեպի Բարձրաշեն գյուղ տանող ճանապարհահատվածը սեպտեմբերի 19-ից փակ է լինելու՝ ճանապարհաշինարարական աշխատանքներով պայմանավորված։ Նշված հատվածում սողանքի հետևանքով ճանապարհը փլվել էր։ Ըստ մամուլի հրապարակումների, այդ խնդիրը տվյալ տարածքում առկա է շուրջ 30 տարի։
«Արհովշին» ՍՊ ընկերության սեփականատեր և տնօրեն Միքայել Գրիգորյանը Factor.am-ի հետ զրույցում հաստատեց, որ շինարարական աշխատանքները սկսվել են սեպտեմբերին։ Թե ինչու է պայմանագիրը կնքվել միայն դեկտեմբերի 18-ին՝ աշխատանքների մեկնարկից ամիսներ անց, Գրիգորյանը նշեց, թե տեղյակ չէ․ «Գնումներով ուրիշ մարդիկ են զբաղվում, ես չեմ տիրապետում»։
Պայմանագրի համաձայն՝ ընկերությունը պետք է կառուցի դրենաժային համակարգ, հենապատ և վերանորոգի վնասված ճանապարհահատվածը։ Ստացվում է, որ աշխատանքները սկսվել են, իսկ դրանց իրավական ձևակերպումը պաշտոնյաները «մոռացել» էին։
Ընդ որում՝ «Գնումների մասին» ՀՀ օրենքով մեկ անձից գնումներ թույլատրվում է իրականացնել բացառիկ դեպքերում՝ երբ ապրանքը, աշխատանքը կամ ծառայությունը հնարավոր է ձեռք բերել միայն մեկ մատակարարից, երբ առաջացել է արտակարգ կամ չնախատեսված իրավիճակ, երբ անհրաժեշտ է նույն մատակարարից ձեռք բերել լրացուցիչ աշխատանքներ, երբ գնման գինը չի գերազանցում 1 մլն դրամը կամ երբ գնումն իրականացվում է Հայաստանի տարածքից դուրս։
Օրենքով նախատեսված այս հիմքերից որևէ մեկը, ըստ էության, կիրառելի չէ Երևանի քաղաքապետարանի և «Արհովշին» ՍՊ ընկերության միջև կնքված 273 մլն դրամ արժողությամբ պայմանագրի դեպքում։ Առավել ևս՝ հաշվի առնելով, որ խնդիրը տվյալ հատվածում տասնամյակների պատմություն ունի, «հրատապ» գնման ընթացակարգի կիրառումը լուրջ հարցեր է առաջացնում։
Ընդ որում՝ Նուբարաշենում ճանապարհի վերանորոգումը Երևանի քաղաքապետարանի և «Արհովշին»-ի միակ «հրատապ» գործարքը չէ․ այս տարվա հունիսի 30-ին նրանք կրկին «հրատապ մեկ անձ» ընթացակարգով պայմանագիր են կնքել 54․9 մլն դրամ ծավալով։ Պայմանագրի համաձայն՝ ընկերությունը պետք է իրականացներ Երևանի Գ․ Հովսեփյան փողոցը Սարալանջին կապող ճանապարհն արտաքին լուսավորության ցանցով կահավորելու աշխատանքներ։ Դրանց վերջնաժամկետը 2025 թվականի դեկտեմբերի 25-ն է։
Ուշագրավ է, որ ըստ պետական ռեգիստրի, 2021 թվականից ի վեր Հարկադիր կատարումն ապահովող ծառայությունը բազմաթիվ արգելանքներ է կիրառել «Արհովշին»-ի նկատմամբ՝ միլիոնավոր գումարներ բռնագանձելու գործերով վարույթների շրջանակում։ Դրանց հիմնական մասն ընկերությունը վճարել է, իսկ 2025-ի ընթացքում չվճարված պայմանագրերի ծավալը մոտ 37 մլն դրամ է։ Դատալեքսի համաձայն՝ դրանք հիմնականում մատակարարված ապրանքների և ծառայությունների դիմաց պարտքեր են, կամ շինաշխատանքների ենթակապալառու ընկերությունների հանդեպ պարտավորություններ։
Գայանե Խաչատրյան
