10.08.2026 | 22:26
Սևանա լճի մակարդակը հունվարի 1-ի համեմատ բարձր է 52 սմ-ով
Արդյոք վարույթ կա Եզրաս արքեպիսկոպոսի՝ օտարերկրյա հատուկ ծառայությունների հետ կապեր պահպանելու ԱԱԾ-ի պնդման առթիվ․ Դատախազությունը բանավոր չի մեկնաբանում
Հասարակություն
22.12.2025 | 11:40
Արդյոք առկա՞ է վարույթ Ամենայն հայոց կաթողիկոս Գարեգին Բ-ի եղբոր՝ Եզրաս արքեպիսկոպոս Ներսիսյանի՝ օտարերկրյա հատուկ ծառայությունների ներկայացուցիչների հետ ներկայում կապեր պահպանելու տեղեկությունների առթիվ։ Դատախազությունից գրավոր հարցում են պահանջում՝ Factor TV-ի այս հարցին պատասխանելու համար։
Հիշեցնենք, որ իշխող «Քաղաքացիական պայմանագիր» կուսակցությանը պատկանող Civic.am կայքում հրապարակվել է Ազգային անվտանգության ծառայությանը վերագրվող տեղեկություն այն մասին, որ Ամենայն հայոց կաթողիկոս Գարեգին Բ-ի եղբայրը՝ Եզրաս արքեպիսկոպոս Ներսիսյանը, 1986-1988 թվականներին համագործակցել է ԽՍՀՄ Պետական անվտանգության կոմիտեի հետ։
ԱԱԾ-ից լրատվամիջոցին հայտնել են նաև, որ «առկա տվյալների համաձայն՝ Եզրաս արքեպիսկոպոս Ներսիսյանը ներկայումս կապեր է պահպանում օտարերկրյա պետությունների հատուկ ծառայությունների ներկայացուցիչների հետ, ինչը կարող է սպառնալիք հանդիսանալ Հայաստանի Հանրապետության անվտանգությանը և շահերին։ Ելնելով վերոգրյալից՝ Ազգային անվտանգության ծառայության կողմից օրենքով իրեն վերապահված լիազորությունների շրջանակներում ձեռնարկվում են անհրաժեշտ միջոցներ նշված սպառնալիքները վերացնելու ուղղությամբ»։
Նշենք, որ Եզրաս արքեպիսկոպոս Ներսիսյանը 2001 թվականի ապրիլից Նոր Նախիջևանի և Ռուսաստանի հայոց թեմի առաջնորդն է և Մոսկվայի ու Համայն Ռուսիո պատրիարքությունում՝ Հայ Եկեղեցու ներկայացուցիչը։ Ըստ Civic.am-ին ԱԱԾ-ից տրամադրված փաստաթղթի՝ նրա՝ ԽՍՀՄ Պետական անվտանգության կոմիտեի հետ համագործակցության հանգամանքը գաղտնազերծվել է 2001-ին։ Նշենք նաև, որ Մայր Աթոռը կամ Եզրաս արքեպիսկոպոս Ներսիսյանը մինչ այս պահը որևէ կերպ չեն արձագանքել մամուլի հրապարակմանը։
Արաքս Մամուլյան
