Քաղաքականություն
05.11.2018 | 14:31Հին Ընտրական օրենսգրքով ընտրությունների գնալը որևէ հեռատես իշխանության ձեռնտու չէ, որովհետև էլի մեկ դեմքի վրա է մնալու ամբողջ ընտրությունները: Այսօր՝ նոյեմբերի 5-ին, լրագրողների հետ հանդիպմանը նման կարծիք հայտնեց ԱԺ նախկին պատգամավոր Վարդան Խաչատրյանը:
«Հեռատես իշխանությունը պետք է հասկանա, որ պետք է ձևավորվի այնպիսի խորհրդարան, որն ի վիճակի է սպասարկել ինչպես ներքին քաղաքականության անկախությունը, այնպես էլ արտաքին քաղաքականության ճկունությունը: Այդպիսի դաշտ փաստացի չի ձևավորվելու և, ըստ էության, ընտրություններն ընթանալու են որպես հասարակությունից մանդատ ստացած մեկ անձի յուրօրինակ քարոզարշավ: Կամայական հեռատես իշխանությունը պետք է ցանկություն ունենա և կամք, որպեսզի, այնուամենայնիվ, օբյեկտիվ իշխանություն գա, հակառակ դեպքում՝ ստիպված է լինելու նորից ընտրություններ անցկացնել և նորից արտահերթ»,- հավելեց Խաչատրյանը:
Նրա խոսքով՝ հաշվի առնելով, որ ո՛չ Կուսակցությունների մասին օրենքն է փոխվել, ո՛չ Ընտրական օրենսգիրքը, ունենալու ենք ոչ այն, ինչը հասարակական դաշտում կայացած ուժերի հարաբերակցություն է: «Դա պայմանավորված է նրանով, որ օրենքը հարմարեցված է եղել այն իրավիճակին և այն ժամանակին, երբ հարաբերակցությունն այսպիսին չի եղել: Որակական անցման արդյունքում օրենքի՝ բացարձակ նույնը մնալը բավական լուրջ մարտահրավեր է լինելու հնարավոր ժողովրդավարական զարգացման համար»,- նշեց բանախոսը:
Ինչ վերաբերում է ՀՀԿ-ին. Վարդան Խաչատրյանն այս կուսակցությանն ընդդիմադիրի դերում չի պատկերացնում. «Դժվար եմ պատկերացնում, թե ինչպիսի ընդդիմություն կարող է լինել ՀՀԿ-ն՝ այն տեսակետից, որ այնտեղ, պայմանական ասած, սելեկցիան ավելի լավը ցանկանալու տեղիք է տվել շատ երկար ժամանակ: Այս տեսակետից բարդ է պատկերացնել, թե ինչպես պետք է կատարեն ընդդիմության դերակատարությունը, երբ այնտեղ հիմնական բազմությունը հավաքված է եղել առավել ոչ դիմադրունակ և ճկուն լինելու գլխավոր հատկանիշով, այսինքն՝ ով դեմ չի գնա իմ կարծիքին»:
Մանրամասները՝ տեսանյութում:
