Քաղաքականություն
10.12.2025 | 13:19
Դեկտեմբերի 9-ին խուզարկություններ են կատարվել Արշակ արքեպիսկոպոս Խաչատրյանի քեռու և զարմուհու տներում։ Այս մասին Factor TV-ի հետ զրույցում հայտնեց փաստաբան Արսեն Բաբայանը։
«Խուզարկությունները միաժամանակ են տեղի ունեցել, թույլ չեն տվել, որպեսզի փաստաբանների զանգահարեն։ Առգրավել են բոլոր հեռախոսներն ու համակարգիչները»,- նշեց նա։
Գործողությունները նախաքննական մարմինը կատարել է Արշակ արքեպիսկոպոս Խաչատրյանին վերագրվող ինտիմ բնույթի տեսանյութերի հրապարակման առնչությամբ նախաձեռնված քրեական վարույթի շրջանակում։ Վարույթը նախաձեռնվել էր Քրեական օրենսգրքի 204-րդ հոդվածի 3-րդ մասի 2-րդ կետով (անձնական կամ ընտանեկան կյանքի գաղտնիությունը խախտելը՝ տեղեկության գաղտնի հավաքման համար նախատեսված տեխնիկական հատուկ միջոց օգտագործելով)։
«Փաստացի այս գործով սրբազանը տուժող է, իրենք գործը քննում են այն կանխավարկածով, որ ինչ-որ մեկը խախտել է նրա անձնական կամ ընտանեկան կյանքի գաղտնիությունը։ Ինչի՞ են հարազատներին այդ նեղությունը պատճառում, ինչի՞ են հարազատներին ներքաշում այս ամենի մեջ։ Ակնհայտ է, որ դրա նպատակն է ճնշել Արշակ սրբազանին և նրա ընտանիքի անդամներին։ Ճնշելու նպատակն էլ այն է, որ Արշակ սրբազանը հետ կանգնի իր դիրքորոշումներից»,- նշեց Բաբայանը։
Առգրավել են ինչպես Արշակ արքեպիսկոպոս Խաչատրյանի քեռու դստեր, այնպես էլ որդիների հեռախոսները։
Հիշեցնենք՝ Արշակ արքեպիսկոպոսին վերագրվող տեսանյութերն առաջինը հայտնվել են Armenian WikiLeaks անունով տելեգրամյան ալիքում հոկտեմբերի 25-ին։ Չնայած այժմ այն արգելափակված է Telegram-ի օգտագործման պայմանները խախտելու համար՝ տեսանյութերը տարածում են գտել և պահպանվել այլ ալիքներում։
Եվգենյա Համբարձումյան
