31.08.2026 | 21:34
Մեսին հայտարարեց Արգենտինայի հավաքականում կարիերան ավարտելու մասին
Լիդիա Մանթաշյանն ազատ կարձակվի. դատարանը վերացրեց խափանման միջոց կալանքը․ ՏԵՍԱՆՅՈՒԹ
Հասարակություն
27.11.2025 | 15:42
Ավելի քան հինգ ամիս կալանքի տակ մնալուց հետո՝ Երևանի ընդհանուր իրավասության դատարանը որոշեց վերացնել Բագրատ Գալստանյանի և մյուսների գործով միակ կին ամբաստանյալ Լիդիա Մանթաշյանի խափանման միջոց կալանքը՝ սահմանելով վարչական հսկողություն և գրավ 2 միլիոն 500 հազար դրամի չափով:
Մանթաշյանի խափանման միջոց կալանքը պարբերաբար երկարաձգելու կամ բողոքարկելու բոլոր միջնորդությունները դատարանները մերժում էին, ինչը բողոքի ալիք էր բարձրացրել քաղհասարակության որոշ ներկայացուցիչների, Մարդու իրավունքների պաշտպանի գրասենյակի, ինչպես նաև «Սրբազան շարժման» համակիրների մոտ։ Մի քանի օր է նրանցից Արման Պետրոսյանը բողոքի նստացույց էր իրականացնում Արդարադատության նախարարության շենքի դիմաց։
Հիշեցնենք՝ ըստ մեղադրանքի, Բագրատ Գալստանյանին մեղադրանք է առաջադրվել այն բանի համար, որ նա իր կողմից նախաձեռնված և ղեկավարվող «Սրբազան պայքար» անվանումով շարժումն իրականացնելու մի քանի ամիսների ընթացքում չկարողանալով Հայաստանի Հանրապետության Սահմանադրությամբ թույլատրված եղանակներով իրագործել իր կողմից շարժման առջև դրված՝ Հայաստանի Հանրապետությունում իշխանությունը ստանձնելու նպատակը, 2024 թվականի նոյեմբեր ամսից սկսած նպատակադրվել է այն իրագործել ՀՀ Սահմանադրությամբ չթույլատրված եղանակով, և այդ նպատակի իրականացման համար շարժման մի շարք մասնակիցների՝ Մովսես Շարբաթյանի, Հայկ Շահնազարյանի, Տիգրան Թոփալյանի, Լիդիա Մանթաշյանի, Հրայր Հակոբյանի, Կարո Օկումուշյանի, Արթուր Սարգսյանի, Իգոր Սարգսյանի, Արա Ռոստոմյանի, Արսեն Ղազարյանի, Արման Իսրայելյանի, Աղվան Արշակյանի, Արմեն Ալեքսանյանի, Միհրան Մախսուդյանի, Դավիթ Գալստյանի և այլ անձանց հետ նախնական համաձայնությամբ խմբի կազմում, ձեռք են բերել ահաբեկչություն կատարելու և իշխանությունը զավթելու համար անհրաժեշտ միջոցներ և գործիքներ, ինչպես նաև դիտավորությամբ ստեղծել են այլ պայմաններ՝ այդ կերպ կատարելով իշխանությունը յուրացնելու նախապատրաստություն։
Ռոզա Վարդանյան
