Հասարակություն
18.11.2025 | 21:30
Հանրակրթական կրթական ծրագրերում օգտագործվող «Օտար լեզու» առարկայի դասագրքերի ստեղծման գործընթացում կներգրավվեն այն դեսպանատները, որոնց երկրներում աապրում են համապատասխան լեզվի կրողներ և ունեն լեզվական, մշակութային և կրթական բովանդակություն ապահովելու բարձր ներուժ։ Այս մասին նախագիծը հանրային քննարկման է ներկայացրել Կրթության, գիտության,մշակույթի և սպորտի նախարարությունը։
Նշվում է, որ դեսպանատների ներգրավումը թույլ կտա ստեղծել ավելի որակյալ և ժամանակակից բովանդակություն՝ գիտական և մեթոդական բարձր ճշգրտությամբ։
«Թեկուզև բովանդակային փորձաքննությունն իրականացվում է դեսպանատան հանձնաժողովի կողմից, դասագրքի տեխնիկական չափորոշիչները պետք է բացառապես ՀՀ իրավական նորմերին համապատասխան լինեն:
Տեխնիկական փորձաքննության իրականացումը ԿԶՆԱԿ-ի ներգրավմամբ և նրա կողմից ձևավորված հանձնաժողովի միջոցով թույլ է տալիս պահպանել պետական վերահսկողությունը դասագրքի վերջնական որակի նկատմամբ, ապահովել դասագրքի համապատասխանությունը ՀՀ սահմանված պարտադիր պահանջներին, տարանջատել բովանդակային և տեխնիկական գնահատման գործառույթները՝ ապահովելով գործընթացի օբյեկտիվությունն ու արդյունավետությունը»,- նշվում է հիմնավորման մեջ։
Եվգենյա Համբարձումյան
