ԱՄՆ նախագահի աջակցությամբ ՀՀ-ի և Ադրբեջանի միջև հաստատված խաղաղությունը կնպաստի տարածաշրջանի զարգացմանը․ Արարատ Միրզոյան

Հայ-վրացական ավանդական բարեկամությունը մեծ հնարավորություններ է բացում փոխադարձ կապերի համար, որոնք կարող են նպաստել մեր հարաբերությունների ամրապնդմանը։ Մեր ռազմավարական գործընկերությունը պետք է նպաստի երկրների միջև փոխկապակցվածության խորացմանը։ Այս մասին Թբիլիսիում հայտարարել է ՀՀ արտաքին գործերի նախարար Արարատ Միրզոյանը՝ վրաց գործընկեր Մակա Բոճորիշվիլիի հետ մամուլի համար համատեղ հայտարարության ժամանակ, փոխանցում է վրացական Առաջին ալիքը։

«Մեր երկրներից յուրաքանչյուրը առանձին, ինչպես նաև ամբողջ Հարավային Կովկասի տարածաշրջանը, որը հսկայական ներուժ ունի, պետք է կապված լինի միմյանց և այլ տարածաշրջանների հետ՝ կապերն ամրապնդելու համար։ Այս համատեքստում «Խաղաղության խաչմերուկ» նախագիծը նորություն չէ։ ԱՄՆ նախագահի աջակցությամբ Հայաստանի և Ադրբեջանի միջև հաստատված խաղաղությունը, մեր կարծիքով, կնպաստի տարածաշրջանի զարգացմանը։ Մեր տարածաշրջանը կարող է իսկապես դառնալ խաչմերուկ։ Հայաստանի և Ադրբեջանի միջև ենթակառուցվածքների ապաշրջափակումը, «Թրամփի երթուղին» Հայաստանում՝ տարածքային ամբողջականության սկզբունքների հիման վրա և այլ մոտեցումներում, մեզ բազմաթիվ հնարավորություններ է տալիս առաջընթացի համար, նաև ապահովում է կայունություն»,- հայտարարել է  Միրզոյանը։

Նրա խոսքով՝ Եվրոպան և Կենտրոնական Ասիան կկապվեն վրացական երկաթուղու միջոցով։

«Հայաստանի տեսլականն է՝ կապ ունենալ ամբողջ աշխարհի հետ։ Հայ-վրացական ավանդական բարեկամությունը հսկայական հնարավորություններ է ընձեռում կապերի համար, որոնք կարող են նպաստել մեր հարաբերությունների զարգացմանը։ Ռազմավարական գործընկերության միջոցով մենք պետք է կարողանանք խորացնել մեր փոխադարձ կապը։ Այսօր իմ գործընկերոջ հետ դիտարկել ենք այս մոտեցումը, և կարծում եմ, որ կա փոխըմբռնում, որն օգտակար է երկու կողմերի համար։ Բնականաբար, մենք քննարկել ենք նաև գործարար շրջանակների հարցեր, և կարծում եմ, որ այս հարցում նույնպես համաձայնության կհասնենք»,- ասել է ՀՀ ԱԳ նախարարը։

Թարգմանությունը՝ Էմմա Չոբանյանի