14.07.2026 | 18:10
Քաղցրաշենում 13-ամյա աղջիկ է մահացել // Հայ գերիների վերաբերյալ համաժողով Բրյուսելում․ ԼՈՒՐԵՐ
Երևանի 143 մանկապարտեզում ենթադրյալ չարաշահումների դեպքով վարույթ է նախաձեռնվել․ ծնողները ստորագրահավաք են կազմակերպել նախկին տնօրենի դեմ
Հասարակություն
12.11.2025 | 13:04
Երևանի 143 մսուր- մանկապարտեզում 2024-ին հայտնաբերված ենթադրյալ չարաշահումների դեպքով վարույթ է նախաձեռնվել։
«Հակակոռուպցիոն կոմիտեում ստացված համապատասխան հաղորդումների հիման վրա նախաձեռնվել է քրեական վարույթ ՀՀ քրեական օրենսգրքի 435 և 436-րդ հոդվածների 1-ին մասերով, ինչպես նաև 256 -րդ հոդվածի 2-րդ մասի 2-րդ կետով։
Իրականցվում է նախաքննություն»,- հայտնում են Հակակոռուպցիոն կոմիտեից։ Խոսքը Կաշառք ստանալու, կաշառք տալու և իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով՝ վստահված գույքը հափշտակելու հանցակազմերի մասին է։
Հիշեցնենք, որ Շենգավիթ վարչական շրջանի թիվ 143 մանկապարտեզի նախկին տնօրեն Ռուզաննա Դանիելյանը 2024 թվականի հուլիսի 7-ին ազատվել է աշխատանքից և ընդդեմ Շենգավիթի թաղապետի դիմել դատարան՝ վիճարկելով իր ազատման որոշումը։ Գործի դատական քննության արդյունքում դատարանը որոշել է նրան վերականգնել զբաղեցրած պաշտոնում։ Ծնողները, սակայն, ընդդիմացել են։ Պատճառը Ռուզաննա Դանիելյանի նկատմամբ անվստահությունն է։
2024 թվականի հունիս-հուլիս ամիսներին Շենգավիթ վարչական շրջանի աշխատակազմի կողմից իրականացված ուսումնասիրությունների արդյունքում մանկապարտեզում ենթադրյալ խախտումներ են բացահայտվել՝ մանկապարտեզում գրանցված կեղծ հաստիքներ, աշխատավարձերի և երեխաների համար նախատեսված սննդամթերքի յուրացման դեպքեր։ Մանկապարտեզի նկուղում, ըստ ծնողների, հայտնաբերվել էին արկղեր, որոնցում թաքցված էին թռչնամիս, կարագ, ձեթ, ջեմ և այլ մթերքներ, որոնք պարբերաբար դուրս են բերվել մանկապարտեզի տնտեսվարի կողմից:
Մանկապարտեզի տնօրենն ու տնտեսվարն աշխատանքից ազատման դիմումներ են գրել։ Մանկապարտեղզի տնօրեն Ռուզաննա Դանիելյանը, սակայն, շուտով նոր դիմում է գրել ու խնդրել անկատար թողնել իր՝ աշխատանքից ազատման դիմումը։ Շենգավիթ վարչական շրջանի ղեկավարը, սակայն, նրան ազատել է աշխատանքից՝ ներկայացված նախնական դիմումի հիման վրա։
Դանիելյանը դիմել է դատարան՝ վիճարկելով իր ազատման կարգադրությունն ու դատարանում հաղթել։
Ծնողները, հասկանալով, որ նախկին տնօրենը կարող է վերադառնալ աշխատանքի, որոշել են չլռել։ Ստորագրահավաք են կազմակերպել, հանցագործության մասին հաղորդում ներկայացրել գլխավոր դատախազ Աննա Վարդապետյանին՝ պահանջելով քրեական վարույթ նախաձեռնել և առնվազն կասեցնել Ռուզաննա Դանիելյանի պաշտոնավարումը։
Նույն օրը աշխատակիցները և ծնողները դիմել են նաև ՀՀ վարչապետ Նիկոլ Փաշինյանին, Երևանի քաղաքապետ Տիգրան Ավինյանին, Մարդու իրավունքների պաշտպան Անահիտ Մանասյանին: Շուրջ 270 սան ունեցող մսուր-մանկապարտեզի ծնողներից մոտ 250-ը միացել է տորագրահավաքին՝ հայտնելով, որ չի ցանկանում, որպեսզի նման բացահայտումներից հետո Դանիելյանը վերադառնա նախկին աշխատանքին:
Նկատի ունենալով, որ առերևույթ հանցագործության մասին հաղորդումը կոռուպցիոն բնույթի հանցագործության մասին է վկայել՝ գործը քննվում է Հակակոռուպցիոն կոմիտեում։
Արաքս Մամուլյան
