05.12.2025 | 20:09
ԱՄՆ-Վրաստան բիզնես ֆորումում ընդգծվել է TRIPP-ի կարևորությունը
865 հազար դոլար՝ առանց մրցույթի․ «Էրեբունի-Երևան-2807» միջոցառումները կազմակերպել է «Ֆակտորի փրոդաքշն» ՍՊԸ-ն․ ՏԵՍԱՆՅՈՒԹ
Տնտեսություն
03.11.2025 | 12:42
«Էրեբունի-Երևան-2807» տոնակատարությունների շրջանակում միջոցառումների կազմակերպումը դարձյալ «Ֆակտորի փրոդաքշն» ՍՊԸ-ն է իրականացրել՝ կրկին մեկ անձից գնման ընթացակարգով։
Factor.am-ը գնումների պետական` Armeps.am հարթակից տեղեկանում է, որ Երևանի քաղաքապետարանն ընկերությանը վճարել է 332 միլիոն 934 հազար 895 դրամ կամ 865 հազար դոլար։ Ուշագրավ է, որ տոնակատարությունները սկսվել են հոկտեմբերի 11-ից, ծառայությունների մատուցման պայմանագիրը, ըստ հարթակի, կնքվել է հոկտեմբերի 24-ին։
Ընկերությունը պարտավորվել է միջոցառումներ կազմակերպել Երևանի տարբեր հատվածներում։ Մասնավորապես, Գաֆէսճեան քանդակների պարտեզի տարածքում, Երևանի Ազատության հրապարակում, Դիանա Աբգարի զբոսայգու տարածքում, Շառլ Ազնավուրի անվան հրապարակում, Կարապի լճի տարածքում և Հանրապետության հրապարակում։ Տոնակատարություններն ամփոփող եզրափակիչ համերգի ընթացքում ելույթ ունեցան Թաթա Սիմոնյանը և Լյուբով Ուսպենսկայան։ Թե Երևանի քաղաքապետարանը որքան է վճարել նրանց, դեռ հայտնի չէ․ Factor.am-ը հոկտեմբերի 1-ին գրավոր հարցում է ուղարկել Երևանի քաղաքապետարան՝ խնդրելով տեղեկատվություն տրամադրել տոնակատարության շրջանակում կազմակերպված միջոցառումների ծախսերի վերաբերյալ, բայց պատասխանը դեռ չենք ստացել։
«Համերգային ծրագրի կազմակերպման շրջանակներում անհրաժեշտ է ապահովել բեմի նախագծման, ԼԷԴ էկրանների կոնտենտի պատրաստման, բեմադրող ռեժիսորի, երաժշտական պրոդյուսերի, երգերի ձայնագրությունների և գործիքավորման, ստեղծագործական, ադմինիստրատիվ ու կոորդինացիոն անձնակազմի, բեմադրող պարուսույցի, առնվազն թվով 6 պարային ելույթներ, երգչի բեմական հագուստ առնվազն 2 հատ, և պարային խմբերի բեմական հագուստի պատրաստում՝ առնվազն 80 հատ, ոճաբանի, վարսահարդարի ու դիմահարդարի ծառայություններ, ԼԷԴ էկրաններին համերգի համաժամանակյա ցուցադրության, հետնաբեմի ապահովման, անձնակազմի սննդի ապահովման, հաշվետու հոլովակի պատրաստման նպատակով նկարահանման ապահովման, բեմի անվտանգության, տրանսպորտային ծախսերի, բանվորական ուժի, տարածքի մաքրության, գեներատորի ապահովման և հոսանքի մոնտաժման ապահովման ծառայություններ»,- Factor.am-ը տեղեկանում է քաղաքապետարանի ու «Ֆակտորի փրոդաքշն» ՍՊԸ-ի միջև կնքված պայմանագրի ուսումնասիրությունից։
Ընկերությունը նման աշխատանքներ պարտավորվել է իրականացնել նաև մյուս հատվածներում կազմակերպված միջոցառումների դեպքում։ Բացի այդ, պայմանագրից տեղեկանում ենք, որ ընկերությունը պարտավորված է եղել նաև զբաղվել մայրաքաղաքի 2807-ամյակի միջոցառումների իրազեկմամբ։
«Միջոցառումը պատշաճ մակարդակով գովազդելու և հանրահռչակելու նպատակով անհրաժեշտ է ապահովել օրվա խորհրդին համահունչ գովազդային առնվազն 8 հոլովակ՝ յուրաքանչյուրն առնվազն 20 վայրկյան տևողությամբ։ Սոցիալական ցանցերի և կայքերի միջոցով ապահովել վերջինիս մարքեթինգային առաջխաղացումը միջոցառման մեկնարկից առնվազն 6 օր առաջ։ SMM արշավը նախատեսել նույն ժամանակահատվածի համար՝ ներգրավելով սոցիալական ցանցեր, ինչպիսիք են՝ Facebook-n, Instagram-n, TikTok-p: Անհրաժեշտ է ապահովել տեսա և ֆոտո հրապարակումներ միջոցառման վերաբերյալ, մասնավորապես՝ մասնակից արտիստների (ինֆլույենսերների) կողմից՝ ապահովելով դրանց հրապարակումը միջոցառումը լուսաբանող հարթակներում։ Յուրաքանչյուր ինֆլույենսեր անհրաժեշտ է հրապարակի առնվազն 1 ռիլ և 1 սթորի»,- նշված է պայմանագրում։
«Ֆակտորի փրոդաքշն»-ը նաև պարտավորված է եղել ապահովել միջոցառման բրենդավորումը, ինչպես նաև դրոշների տպագրություն։ Պարտավորված է եղել նաև Երևանի տարբեր հատվածներում տեղադրել առնվազն 10 տեղեկատվական բնույթ կրող սյուներ։
Նշենք նաև, որ անցյալ տարի Էրեբունի-Երևան 2806-ամյակի եզրափակիչ համերգի կազմակերպիչը ևս «Ֆակտորի փրոդաքշն»-ն էր։ Իրավաբանական անձանց պետռեգիստրի համաձայն՝ «Ֆակտորի փրոդաքշն» ընկերությունը ստեղծվել է 2017-ին։ Հիմնադիրներն են Վազգեն Պողոսյանը և Ռուդիկ Տեր-Գալստյանը, որոնք աշխատել են «Շարմ հոլդինգ» ՍՊԸ-ում, Հանրային հեռուստաընկերությունում, երբ վերջինի ղեկավարը Ռուբեն Ջաղինյանն էր։
«Ֆակտորի փրոդաքշն»-ը կառավարական տարբեր միջոցառումներ կազմակերպելու համար առանց որևէ մրցակցության բազմամիլիոնանոց ծրագրեր է շահել։
Արփի Հակոբյան
