Հրանտ-Լեոն Ռանոսը՝ դուբլի ու գոլային փոխանցման հեղինակ․ ՏԵՍԱՆՅՈՒԹ

Հայաստանի ազգային հավաքականի հարձակվող Հրանտ-Լեոն Ռանոսը դուբլի ու գոլային փոխանցման հեղինակ է դարձել Մյոնխենգլադբախի «Բորուսիայի» երկրորդ թիմի կազմում։

«Բոխում 2»-ի դեմ Ռեգիոնալ լիգայի (Գերմանիայի չորրորդ լիգա) 14-րդ տուրի տնային խաղում 22-ամյա ֆուտբոլիստը դաշտ է դուրս եկել մեկնարկային կազմում, իսկ 14-րդ րոպեին բացել է հաշիվը 11-մետրանոց հարվածով։ 64-րդ րոպեին Ռանոսը կատարել է գոլային փոխանցում, իսկ ավելացված ժամանակում ձևակերպել է հանդիպման վերջնական հաշիվը։

Հրանտ-Լեոն Ռանոսը «Բորուսիայի» երկրորդ թիմի կազմում այս մրցաշրջանում անցկացրել է 2 խաղ, գրանցել 2-ական գոլ ու ասիստ։

Ավելի վաղ լուրեր էին շրջանառվում, որ Մյոնխենգլադբախի «Բորուսիան» դիտարկում է ձմեռային տրանսֆերային պատուհանի ընթացքում Ռանոսից բաժանվելու տարբերակը։ Հայ հարձակվողը 2023 թվականին է Մյունխենի «Բավարիայի» երկրորդ թիմից տեղափոխվել «Բորուսիա»։ Գերմանիայի Բունդեսլիգայի ընթացիկ մրցաշրջանում Ռանոսը մասնակցել է 5 հանդիպման ու դարձել 1 գոլի հեղինակ։ Առաջնության նախորդ 4 խաղում նա չի ընդգրկվել թիմի հայտացուցակում։ Ռանոսը 2023 թվականից է խաղում Հայաստանի հավաքականում, որի կազմում անցկացրել է 21 հանդիպում ու խփել 5 գոլ։ Անցած մրցաշրջանի երկրորդ կեսը հարձակվողը վարձակալությամբ անցկացրել է գերմանական 2-րդ Բունդեսլիգան ներկայացնող «Կայզերսլաուտերնում»։ Transfermarkt-ը 1 միլիոն եվրո է գնահատում Հայաստանի հավաքականի խաղացողի տրանսֆերային արժեքը։