16.09.2026 | 13:07
Դուք ուզում եք գազը թանկանա, ուզում եք սանկցիաները ավելանան․ Թունյանը՝ «Ուժեղ Հայաստան»-ին․ ՏԵՍԱՆՅՈՒԹ
Հայաստանն ու Ֆրանսիան 2023-2024 թվականներին 278,5 միլիոն եվրոյի զենքի գնման պայմանագրեր են կնքել
Քաղաքականություն
03.11.2025 | 12:08
Ֆրանսիայի Պաշտպանության նախարարությունը երկրի խորհրդարան ներկայացված զեկույցում անդրադարձ է կատարել Հայաստանի հետ պաշտպանական ոլորտում համագործակցությանը։ Մասնավորապես, նշվում է, որ պաշտպանական գործընկերությունների բազմազանեցման քաղաքականության շրջանակում Հայաստանը որոշել է դիմել Ֆրանսիային՝ իր պաշտպանական կարողություններն ամրապնդելու և բնակչությանը պաշտպանելու համար: Այս համագործակցությունը, որը տեղի է ունենում կարողությունների զարգացման միջոցով՝ նոր սարքավորումների փոխանցման և արտահանման, ինչպես նաև զորավարժությունների օպերատիվ գործունեության միջոցով, ունի խիստ պաշտպանական բնույթ:
2023 թվականի հունվարին Երևանում ֆրանսիական պաշտպանական առաքելության հաստատումը Ֆրանսիային հնարավորություն է տալիս շփվելու իր հայ գործընկերոջ հետ՝ թույլ տալով լավագույնս որոշել այս համագործակցության ամրապնդման ուղիները։
Ընդգծվում է, որ Ֆրանսիայի զինված ուժերի նախարար Սեբաստիան Լըկորնյուի և Հայաստանի պաշտպանության նախարար Սուրեն Պապիկյանի միջև բարձր մակարդակի հանդիպումները հաճախակիացել են, որոնցից վերջինը տեղի է ունեցել 2024 թվականի դեկտեմբերին՝ քննարկելու ուղիները, որոնցով Ֆրանսիան կարող է նպաստել Հայաստանի ինքնիշխանության ամրապնդմանը և անվտանգության իրավիճակին։
Զեկույցում նշվում է, որ մինչև 2022 թվականը ֆրանսիական արտահանումը Հայաստան գործնականում գոյություն չուներ, 2023 թվականի վերջին և 2024-ին ցամաքային սարքավորումների բազմաթիվ պայմանագրեր են ստորագրվել՝ Հայաստանի պաշտպանական կարողությունները հզորացնելու համար: Այլ հեռանկարներ, ինչպես նաև Հայաստանի պաշտպանական արդյունաբերական և տեխնոլոգիական բազայի զարգացմանը նպաստող նախագծերը դեռևս քննարկման փուլում են։
Ֆրանս-հայկական պաշտպանական գործընկերությունը ձևավորվում է նաև կադրերի պատրաստման ոլորտում․ լեռնային մարտերում հայ զինվորներին մարզելու համար ուղարկվել է լեռնային հետևակային հրահանգիչների ջոկատ, ինչպես նաև Սեն-Սիրի ռազմական ակադեմիայի և Վազգեն Սարգսյան անվան ռազմական ակադեմիայի միջև կնքվել է համաձայնագիր՝ հայ սպաների պատրաստման համար։
Նշվում է, որ հավատարիմ մնալով միջազգային իրավունքի և ազգերի տարածքային ամբողջականության նկատմամբ հարգանքի իր սկզբունքներին՝ Ֆրանսիան վճռականորեն կանգնած է Հայաստանի կողքին՝ պաշտպանելու իր տարածքը և ժողովրդին։ Ֆրանսիան ակտիվորեն հանձնառու է աջակցելու իր գործընկերոջը՝ Հարավային Կովկասում արդար և երկարատև խաղաղության հասնելու գործում։
Բացի այդ, զեկույցի հավելվածից պարզ է դառնում, որ Հայաստանն ու Ֆրանսիան 2023 և 2024 թվականներին կնքել են 278,5 միլիոն եվրոյի զենքի պայմանագրեր։ 2023 թվականի համար այն կազմում է 74,2 մլն եվրո, 2024 թվականի համար՝ 204,3 մլն եվրո։
Թարգմանությունը՝ Էմմա Չոբանյանի
