Քաղաքականություն
27.10.2025 | 20:23
Վարչապետ Նիկոլ Փաշինյանն ընդունել է «Եվրանեսթ» խորհրդարանական վեհաժողովի բյուրոյի անդամներին։ Այս մասին տեղեկացնում են Կառավարությունից:
Վարչապետը ողջունել է նրանց այցը Հայաստան և «Եվրանեսթ» Խորհրդարանական վեհաժողովի 12-րդ լիագումար նիստի անցկացումը Երևանում։ Նիկոլ Փաշինյանը հույս է հայտնել, որ նիստը կանցնի արդյունավետ, և կարևորել միջխորհրդարանական ակտիվ երկխոսությունն ու համագործակցությունը։
Հաջորդիվ վարչապետն անդրադարձել է Հայաստան–Եվրոպական միություն հարաբերությունների հետագա զարգացմանն ու խորացմանը։ Երկրի ղեկավարը նշել է, որ ՀՀ Կառավարությունը հետևողականորեն շարունակում է ժողովրդավարական բարեփոխումների առաջմղումը ԵՄ օժանդակությամբ, այդ թվում՝ տարբեր ոլորտներում եվրոպական ստանդարտները ներդնելու նպատակով։ Այս առումով, վարչապետը կարևորել է ԵՄ-ի կողմից ինչպես ֆինանսական, այնպես էլ տեխնիկական ու փորձագիտական աջակցության շարունակականությունը։
Անդրադարձ է կատարվել Հայաստանի և Ադրբեջանի միջև հարաբերությունների կարգավորման գործընթացին։ Նիկոլ Փաշինյանն ընդգծել է խաղաղության հաստատման փաստը և նշել, որ ներկայումս ձևավորվել է բարենպաստ մթնոլորտ՝ երկխոսությունը և քննարկումները արդյունավետ շարունակելու համար։
«Եվրանեսթ» խորհրդարանական վեհաժողովի բյուրոյի անդամները ողջունել են ժողովրդավարական բարեփոխումների իրականացման և ԵՄ-ի հետ հարաբերությունները խորացնելու ուղղությամբ Հայաստանի քայլերը՝ նշելով, որ խորհրդարանական ձևաչափով ևս հայաստանյան գործընկերների հետ ունեն սերտ համագործակցություն։ Միաժամանակ, նրանք ողջունել են Հայաստանի և Ադրբեջանի միջև խաղաղության հաստատումն ու հույս հայտնել, որ այն կնպաստի տարածաշրջանում կայունության ապահովմանն ու համագործակցության խթանմանը։
Անդրադարձ է կատարվել նաև տարածաշրջանային հաղորդակցության ուղիների ապաշրջափակման ուղղությամբ իրականացվող քայլերին, սահմանազատման գործընթացին և այլ թեմաների։
