16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Ստորագրահավաք «Հանրային հեռուստաընկերությունը հանրությանը վերադարձնելու» օրակարգով
Քաղաքականություն
27.10.2025 | 20:10
«Նժար» սահմանադրական շարժման անդամները ստորագրահավաք են սկսում «Հանրային հեռուստաընկերությունը հանրությանը վերադարձնելու» օրակարգով։
Հայտարարությունը ներկայացնում ենք ստորև
«Մենք՝ ստորագրած քաղաքացիներս, հասարակական և քաղաքական տարբեր շրջանակների ներկայացուցիչներս, հայտարարում ենք, որ Հանրային հեռուստաընկերությունը, որը օրենքով պարտավոր է ծառայել հանրային շահին և ապահովել բազմակարծություն, բոլոր իշխանությունների օրոք վերածվել է իշխանությունների շահերը սպասարկող քարոզչամիջոցի՝ կորցնելով իր անկախ գործելու հիմնական առաքելությունն ու կոչումը, ըստ այդմ, նաև՝ հանրային վստահությունը։
Այսօր այդ արատավոր կախվածությունը հասել է վտանգավոր աստիճանի։ Հանրային կառույցի անվան տակ գործող մեդիա համակարգը խաթարում է հանրային խոսքի հավասարակշռությունը, խեղաթյուրում է հասարակական իրողությունները և վերածվել է գործող քաղաքական ուժի և նրա մերձավոր շրջանակների համար ազդեցության հիմնական գործիքի՝ հակասելով ՀՀ օրենքներին և հանրային բարոյականության նորմերին։
Այս իրավիճակը ուղղակիորեն հակասում է «Տեսալսողական մեդիայի մասին» ՀՀ օրենքի հիմնարար սկզբունքներին, որոնք հստակ սահմանում են Հանրային հեռարձակողի պարտավորությունները՝ երաշխավորելու խմբագրական անկախություն, ապահովելու քաղաքական և գաղափարական չեզոքություն, ծառայելու հանրային շահին և արգելելու միակողմանի քարոզչությունը։
Այս պարագայում բարձրացվող հիմնախնդիրը բնավ անձնավորված չէ և ուղղակիորեն առնչվում է հանրային կարևոր ինստիտուտի էության և նպատակների հետևողական խեղաթյուրման հիմնահարցին։
Կլոր սեղանի որոշմամբ
Հոկտեմբերի 27-ին կայացած «Հանրայինը վերադարձնենք հանրությանը» խորագրով կլոր սեղանի մասնակիցները որոշեցին․
1. Ստեղծել 15 հոգուց բաղկացած հանձնաժողով, որը կհանդիպի յուրաքանչյուր 15 օրը մեկ՝ հանրային հեռուստատեսության և ռադիոյի անաչառությունն ու ապաքաղաքականացման ռազմավարությունը մշակելու նպատակով։
2. Ձևավորել 7 հոգուց բաղկացած աշխատանքային խումբ, որը կգործի ամենօրյա ձևաչափով՝ համակարգելով կազմակերպչական և հանրային հաղորդակցության գործընթացները։
3. Մշակել հանրային վերահսկողության մեխանիզմ, որը կապահովի լրագրողական էթիկայի պահպանումը, խոսքի հավասար պայմանները և տեղեկատվության հավասարակշռությունը։
Պահանջներ և կոչ
● Հանրային հեռուստաընկերության խորհուրդը պարտավոր է ներկայացնել հաշվետվություն իր գործունեության վերաբերյալ և քննարկել ինքնալուծարման կամ նոր կազմ ձևավորելու հարցը։
● Հանրային հեռուստաընկերության ղեկավարությունը պետք է դադարեցնի իշխանահաճո միակողմանի քարոզչական գործունեությունը և երաշխավորի բոլոր քաղաքական ու հասարակական ուժերի հավասար և արդար մուտքը եթեր։
● Քաղաքացիական հասարակությանը, փորձագետներին և մեդիա միություններին կոչ ենք անում ձևավորել համատեղ հարթակ՝ վերահսկելու Հանրայինի գործունեությունը՝ որպես հանրային բարիք, ոչ թե իշխանական գործիք, որը որոշ դեպքերում օգտագործվում է իշխանության ներկայացուցիչներին տարբեր օրինախախտումներն արդարացնելու համար։
● Քաղաքական ու հասարակական բոլոր կառույցներին կոչ ենք անում բոյկոտել Առաջին ալիքը, մինչև կառույցում չապահովվի իրական բազմակարծություն և հանրային վերահսկողություն։
Մենք համոզված ենք, որ Հանրային հեռուստաընկերությունը կարող է և պետք է դառնա հանրային վստահության խորհրդանիշը՝ վերադառնալով իր իրական կոչմանը և վերականգնելով իր հեղինակությունը: անունը։
Հանրային հեռուստաընկերությունն ու ռադիոն չեն կարող դառնալ կուսակցական ու ընտանեկան շահեր սպասարկող քարոզչական հարթակ։
Սույն հայտարարությունը բաց է միանալու բոլոր այն քաղաքացիների և կազմակերպությունների համար, որոնք կիսում են այս մտահոգություններն ու նպատակները»։
