04.06.2026 | 21:44
Հայաստանը 5500 վարդ է արտահանել Լատվիա. ԵՄ-ն խոստանում է աջակցել հայկական արտադրանքի մուտքին եվրոպական շուկա
Փոշի շնչող Երևանը․ Ավինյանն ինքն իրեն կտուգանի՞. ՏԵՍԱՆՅՈՒԹ
Հասարակություն
27.10.2025 | 20:15
Սարյան փողոցի աստիճանների հակառակ կողմում մայթն են լայնացնում։ Եզրաքարեր են կտրում, իսկ փոշին տարածվում է տասնյակ մետրեր։ Աշխատանքներն իրականացնում է մրցույթում հաղթած ընկերությունը, վերահսկում է Կենտրոն վարչական շրջանը։
Factor TV-ի տեսախցիկը ֆիքսել է, որ աշխատողներն առանց դիմակի են և առաջինն իրենք են շնչում կտրված քարերից բարձրացող փոշին։ Տարածքում դրված ավազի ու ցեմենտի պարկերն էլ ծածկված չեն անթափանց թաղանթով՝ նորմեր, որոնք պետք է պահպանվեն շինաշխատանքների ժամանակ։
Երևանի ավագանու ընդդիմադիր անդամ Քրիստինա Վարդանյանը նկատում է՝ ստանդարտներ ու գործիքներ կան, բայց Երևանի քաղաքապետարանը դրանք չի օգտագործում։
Շինարարներն էլ լսել էին աշխատանքային համապատասխան գործիքների մասին, բայց աշխատում են այն ամենով, ինչ ձեռքի տակ է։ Դիմակ էլ թեև ունեն, բայց չեն կրում։
Երբ քաղաքապետարանից հետաքրքրվեցինք, թե ով է պատասխանատու այս ամենի համար, պատասխանեցին՝ շինարարը զգուշացվել է խստորեն պահպանել շինարարական հրապարակի կահավորման պահանջները: Արդյո՞ք նման աշխատանքների ժամանակ հնարավոր չէ կիրառել սարքեր, որոնք կկլանեն փոշին, քաղաքապետարանից հորդորեցին հարցում ուղարկել, որ արդեն արել ենք։ Քաղաքապետ Տիգրան Ավինյանը պարբերաբար է խոսում խոշոր շինհրապարակներում կառուցապատողների կողմից նորմերը չպահելու մասին։ Մինչ իշխանությունը խոսում է պատժից, մարդիկ բողոքում են քաղաքի կենտրոնում օդի որակից։
Եվրոպական քաղաքներում վաղուց օգտագործվում են պարզ միջոցներ շինաշխատանքների փոշին նվազագույնի հասցնելու համար, օգտագործվում են ջրացրիչ համակարգեր։ Օրինակ՝ Նիդերլանդներում քաղաքային շինարարական աշխատանքների թույլտվություն ստանալու պայմաններից մեկը փոշու վերահսկման պլանի ներկայացումն է․ առանց դրա աշխատանքը չի կարող սկսվել։ Իսկ Երևանում քաղաքապետը, որը գրեթե բոլոր նիստերին խոսում է խոշոր կառուցապատողների կողմից նորմերը չպահելու մասին, կարծես, մոռացել է հսկել հենց համայնքի համար իրականացվող աշխատանքների ընթացքում նորմերի պահպանումը։
Մանրամասները՝ տեսանյութում։
Անի Թամրազյան
