Դանակահարություն դատարանում․ սպանվածի եղբայրը վնասել է մեղադրյալներից մեկին ու դիմել փախուստի

Այսօր դանակահարություն է տեղի ունեցել Լոռու մարզի ընդհանուր իրավասության դատարանում։ ՆԳՆ ոստիկանությունից հաստատում են դանակահարության ահազանգի մասին տեղեկությունը և  հայտնում, որ դեպքի  հանգամանքները պարզվում են։

Իրավապահ համակարգում Factor TV-ի աղբյուրների փոխանցմամբ՝ Լոռու մարզի դատարանի նախագահ Մուշեղ Հարությունյանի վարույթում ժամը 15։00-ին նշանակված սպանության գործով դատական նիստի ավարտին սպանվածի եղբայրը դանակով հարվածել է գործով 4 մեղադրյալներից մեկին և դիմել փախուստի։

Գործը վերաբերում է 2024 թվականի հոկտեմբերի 9-ի լույս 10-ի գիշերը Ստեփանավանում տեղի ունեցած սպանությանը։

Այս գործով մեղադրյալի աթոռին է 4 անձ՝ Յուրա Մկրտումյանը, Էրիկ Դադիվանյանը, Գեղամ Նազարյանը և Գոռ նազարյանը։

Տուժողի եղբայրն, ըստ նախնական տեղեկությունների, դանակահարել է մեղադրյալներից Էրիկ Դադիվանյանին։ Նա այժմ հիվանդանոցում է։

Նշենք, որ ըստ մեղադրանքի՝  Էրիկ Կարենի Դադիվանյանը 2024 թվականի հուլիսի 9-ի լույս 10-ի գիշերը, ընկերների՝ Յուրա Մկրտումյանի, Գեղամ Նազարյանի, Գոռ Հակոբի Նազարյանի հետ, Հայկ Մաղաքյանին հրավիրել են Յուրա Մկրտումյանի ընտանիքի կողմից տնօրինվող՝ Լոռու մարզի Լոռի Բերդ համայնքի Լոռի Բերդ բնակավայրի Անդրանիկի 5 հասցեի տուն, որտեղ վիճաբանության ժամանակ, Գեղամ և Գոռ Նազարյանները, Էրիկ Դադիվանյանը և Յուրա Մկրտումյանը, խմբի կազմում, փոխլրացնելով միմյանց գործողությունները, Հայկ Մաղաքյանին ապօրինաբար կյանքից զրկելու՝ սպանելու դիտավորությամբ, բութ, կոշտ, ինչպես նաև կտրող շեղբ ունեցող առարկաների գործադրմամբ առնվազն 5 հարվածներ են հասցրել Հայկ Մաղաքյանի գլխի, ինչպես նաև որովայնի առաջնային և հետին մակերեսներին՝ սպանելով նրան: Այնուհետև Էրիկ Դադիվանյանը, ինքնությունը պարզված անձի և Գոռ Նազարյանի հետ, վերջինիս վարած ավտոմեքենայով հիշյալ բնակարանից Հայկ Մաղաքյանի դին տեղափոխել և թաքցրել են նույն բնակավայրի «Գառադոկ» կոչվող հանդամասում՝ մասամբ այրելով դիակի հագին եղած հագուստները և դին՝ ծածկելով հողով ու քարերով:

Արաքս Մամուլյան