Այսօրվանից պատրաստ ենք ապահովել բեռնատարների տարանցումը Թուրքիայից դեպի Ադրբեջան և հակառակը․Փաշինյան․ ՏԵՍԱՆՅՈՒԹ

Ազգային ժողովի մշտական հանձնաժողովների համատեղ նիստում հոկտեմբերի 27-ին մեկնարկել են «ՀՀ 2026 թվականի պետական բյուջեի մասին» ՀՀ օրենքի նախագծի նախնական քննարկումները:

ՀՀ վարչապետ Նիկոլ Փաշինյանն անդրադարձել է Հայաստանի եւ Ադրբեջանի միջեւ հաստատված խաղաղության, բյուջեի հավաքագրման գործընթացի ու ձեւավորման մեխանիզմներին:

Վարչապետը նախ վկայակոչել է այն փաստը, որ առաջին անգամ է, երբ ՀՀ բյուջեն քննարկվում է Ադրբեջանի հետ հաստատված խաղաղության պայմաններում: «Արդեն մեկ տարի 8 ամիս է՝ Հայաստան-Ադրբեջան սահմանին փոխհրաձգության հետեւանքով զինվոր չի զոհվել: Մեր անկախության պատմության մեջ երբեւէ այսպիսի մեկ տարի 8 ամիս չենք ունեցել»,- ընդգծել է Նիկոլ Փաշինյանը:

Գործադիրի ղեկավարի խոսքով նոր փաստեր, հանգամանքներ է ի հայտ բերում հաստատված խաղաղությունը՝ մասնավորապես նկատի ունենալով Ադրբեջանի հայտարարությունը, որով վերացնում են դեպի Հայաստան տարանցման սահմանափակումները: «Սա, ըստ էության, պատմական իրադարձություն է եւ նշանակում է ՀՀ շրջափակման հաղթահարման առաջին փուլը, բայց կարեւոր է, որ Հայաստանը նաեւ արձագանքող լինի այդ հայտարարություններին եւ նաեւ համապատասխան քայլեր անի»,- հավելել է վարչապետը եւ նշել. «Այս պահին դրան մեր արձագանքը հետեւյալն է՝ հենց այսօրվանից մենք պատրաստ ենք ապահովել բեռնատար ավտոմեքենաների տարանցումը Թուրքիայից դեպի Ադրբեջան եւ Ադրբեջանից դեպի Թուրքիա, մասնավորապես՝ Մարգարա-Եղեգնաձոր-Սիսիան-Գորիս երթուղով»:

Նիկոլ Փաշինյանն անդրադարձել է նաեւ Ղազաստանից Ադրբեջանով դեպի Հայաստան հացահատիկի առաջին խմբաքանակի ներմուծմանը, ինչը տեղի է ունենալու Ադրբեջան-Վրաստան-Հայաստան երկաթուղային երթուղով:

«Ինչպես Ադրբեջանը մեզ համար վերացրել է տարանցման սահմանափակումները, նույնկերպ եւ մենք վերացնում ենք տարանցման սահմանափակումները: Մենք առաջիկայում պետք է ինտենսիվ զբաղվենք Վաշինգտոնի խաղաղության հռչակագրի 3-րդ եւ 4-րդ կետերի լիարժեք իրականացմամբ, որի արդյունքում Հայաստանի եւ Ադրբեջանի՝ միմյանց նկատմամբ տարանցման արգելքի այս որոշումները կլինեն լիարժեք եւ ամբողջական»,- ընդգծել է գործադիրի ղեկավարը:

«Խաղաղությունը Հայաստանի եւ Ադրբեջանի միջեւ հաստատված փաստ է»,- նշել է Նիկոլ Փաշինյանն ու խոսել խաղաղության հաստատման ուղղությամբ իրականացվող շարունակական աշխատանքի մասին: