Երեկ ազատազրկման դատապարտված Դավիթ Համբարձումյանը չի կալանավորվել․ նա դատավճռի հրապարակմանը ներկա չի եղել

Երեկ 6 տարի և 3 ամիս ժամկետով ազատազրկման դատապարտված Մասիսի համայնքապետ Դավիթ Համբարձումյանը ներկա չի եղել իր գործով դատավճռի հրապարակմանը և արգելանքի չի վերցվել։ Այս մասին Factor TV-ին հայտնում են դատարանից։

Դատավոր Ժորա Չիչոյանը նաև որոշել է վերացնել Համբարձումյանի նկատմամբ կիրառված խափանման միջոց գրավը և որպես խափանման միջոց կիրառել կալանքը։

Թե որտեղ է Համբարձումյանը, մեզ հայտնի չէ, սակայն Մասիսում շրջանառվում են տեղեկություններ, որ նա այս պահին Հայաստանում չէ։ Փորձեցինք կապ հաստատել համայնքապետի հետ, սակայն նա մեր հեռախոսազանգին չպատասխանեց։

Ըստ մեղադրանքի՝ Դավիթ Համբարձումյանը 2018թ․ ապրիլի 22-ին Արարատի մարզի Հայանիստ-Հովտաշատ գյուղերի խաչմերուկի բանուկ հատվածում մի խումբ անձանց հետ դիտավորությամբ կոպիտ կերպով խախտել է հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունք և զուգորդվել նույն օրը ժամը 19։00-ի սահմաններում Հանրապետության հրապարակում կայանալիք հանրահավաքին մասնակցելու նպատակով դեպի նշված հրապարակ երթ կազմակերպած մասնակիցների նկատմամբ նախապես իրենց հետ վերցված զենքի և որպես զենք հանդիսացող առարկաների գործադրմամբ բռնություն գործադրելով և գույքը ոչնչացնելով։

Հետաքրքիր է այն հանգամանքը, որ այս դեպքերից հետո՝ 2018-ի նոյեմբերի 1-ին, Հայաստանում համաներման մասին օրենք է ընդունվել, համաձայն որի՝ համաներում կիրառելով՝ պատժից ազատվում են օրենքի ուժի մեջ մտնելու դրությամբ մինչև 6 տարի ժամկետով ազատազրկման դատապարտված երեք կամ ավելի անչափահաս երեխա ունեցող անձինք։ Համբարձումյանը 4 անչափահաս երեխա ունի, և եթե դատարանը նրա նկատմամբ պատիժ նշանակեր ոչ թե 6 տարի և 3 ամիս, այլ մինչև 6 տարի ժամկետով ազատազրկումը, ապա նա համաներմամբ կազատվեր պատժից։

Նշենք, որ խորհրդարանական ընդդիմությունն իմփիչմենթի միջոցով ՀՀ վարչապետ Նիկոլ Փաշինյանին պաշտոնից հեռացնելու նախաձեռնություն էր սկսել և հայտարարել, որ իրենց վարչապետի թեկնածուն Դավիթ Համբարձումյանն է։ 

Արաքս Մամուլյան