Մենք դա արել ենք առաջին հերթին ոչ թե Ղուկասյանի, այլ նրա օգտին քվեարկածների համար. Սերժ Սարգսյան. ՏԵՍԱՆՅՈՒԹ

«Եկեղեցու դեմ հալածանքները միայն ու միայն ուժեղացնում են եկեղեցուն»,- այս մասին այսօր լրագրողների հետ զրույցում ասաց ՀՀ երրորդ նախագահ Սերժ Սարգսյանը:

Խոսելով Գյումրիի համայնքապետ Վարդան Ղուկասյանի նկատմամբ քրեական հետապնդման մասին՝ Սերժ Սարգսյանը նշեց, որ այսօրվա իշխանությունը զրո հանդուրժողականություն ունի այլակարծության նկատմամբ:

Հարցին՝ արդյոք ավելի անխոցելի թեկնածուի Գյումրիի քաղաքապետ դարձնելու դեպքում Գյումրիում կլինե՞ր այս իրավիճակը, Սերժ Սարգսյանը պատասխանեց, որ Վարդան Ղուկասյանը ընդդիմադիրներից ամենաշատ քվե ստացած թեկնածուն էր:
«Մենք դա արել ենք առաջին հերթին ոչ թե Վարդան Ղուկասյանի, այլ մեր ժողովրդի այն հատվածի համար, որը քվեարկել է Վարդան Ղուկասյանի օգտին»,- ասաց Սարգսյանը:

Դիտարկմանը, որ ժողովուրդը կարող է և սխալվել, բայց քաղաքական ուժերը չպետք է սխալվեն, Սարգսյանն արձագանքեց.
«Հա՞, հիմա  այդպե՞ս եք կարծում: Ո՛չ, ժողովուրդը չի կարող սխալվել, ժողովուրդը կարող է մոլորվել, ինչ-որ պահի տրվել պոպուլիստների հորդորներին»,- ասաց Սարգսյանը:

Խոսելով իր հրաժարականի պատճառների մասին՝ Սարգսյանն ասաց, որ ինքը չէր կարող կասկածի տակ դնել Արցախի անվտանգությունը, ինչից կարելի էր  ենթադրել, որ հանուն Արցախի անվտանգության է հրաժարական տվել, այնինչ նրա թիմակիցները նրա հրաժարականից և Նիկոլ Փաշինյանի իշխանության գալուց ամիջապես հետո հայտարարում էին, թե Փաշինյանը եկել է՝ Արցախը հանձնելու: Արդյոք հակասություն չկա՞ Սարգսյանի և նրա թիմակիցների հայտարարությունների միջև: Ի պատասխան այս հարցի՝ երրորդ նախագահն ասաց, որ հակասություն չկա և թիմակիցները «Արցախը հանձնել» ասելով չէին պատկերացնում Արցախի այսպիսի հանձնումը, այլ բանակցությունների գործընթացում զիջումների գնալը, որի հետևանքով Արցախը կարող էր հայտնվել Ադրբեջանի կազմում:

«Ես էլ դա նկատի ունեի, որովհետև իմ այլ գործողություններ կվնասեն բանակցային գործընթացին: Էսպես «ոտքի վրա» դժվար էր բացատրել բայց վստահ եղեք, որ ցանկացած բանակցություններում միջնորդները գնում են այն ուղղությամբ, որտեղից հեշտ է համաձայնություն կորզելը» ասաց Սարգսյանը:

Մանրամասները՝ տեսանյութում

Արաքս Մամուլյան