05.10.2026 | 18:30
Գերմանիայի հետախուզության ղեկավարը հայտարարել է, որ Բեռլինին ռազմական հակամարտություն է սպառնում Ռուսաստանի հետ
«30-40 մարդու տարել են, այդ թվում՝ Վարդան Ղուկասյանի խորհրդականին»․ Գյումրիի փոխքաղաքապետ
Հասարակություն
22.10.2025 | 16:25
«Եթե վաղը քաղաքը մաքրված չտեսաք, քաղաքապետարանին չմեղադրեք»,- Գյումրիի քաղաքապետարանի ֆեյսբուքյան էջում հրապարակված տեսանյութում հայտարարել է Գյումրիի փոխքաղաքապետ Գագիկ Մանուկյանը։
Նա նշում է, թե իրավապահները կոմունալ ծառայությունների աշխատակիցներին բերման են ենթարկում ու «չեն վերադարձնում»․ «Վարորդ մարդը, կամ մաքրող կինը ի՞նչ պիտի արած լինեն։ Էդ մարդկանց ինչո՞ւ եք տանում, պահում»։
Մանուկյանի խոսքով՝ ավագանու 2 անդամի ևս բերման են ենթարկել, «30-40 մարդու տարել են, տարբեր ոստիկանության բաժիններով ցրել են»։
«Քաղաքապետի խորհրդական Աշոտ Պետրոսյանին տարել են, աշխատանքի բոլոր նյութերն իր մոտ են, ինքը պետք է հանձնարարականները տար»,-նշել է նա և դիմել Ազգային ժողովի պատգամավորներին, հորդորել ավելի զգույշ խոսել Վարդան Ղուկասյանին առաջադրված մեղադրանքների մասին, հետաքրքրվել է՝ «ինչո՞ւ են չափն ու սահմանը անցնում, ինչո՞ւ են վիրավորում»։
Factor.am-ի աղբյուրները հաստատում են՝ ձերբակալվածների թվում են նաև Ղուկասյանի խորհրդականը և համայնքապետարանի բաժիններից մեկի պետը։
Քննչական կոմիտեից էլ հայտնում են, որ առերևույթ փաստական տվյալներ են ձեռք բերվել այն մասին, որ 2025 թվականի հոկտեմբերի 20-ին Գյումրու համայնքապետարանի վարչական շենքում ՀՀ հակակոռուպցիոն կոմիտեում քննվող քրեական վարույթի շրջանակներում քննիչների կողմից իրականացված քննչական գործողություններին խոչընդոտելու նպատակով Գյումրու համայնքապետարանի վարչական շենքի մոտ՝ այդ թվում նաև մուտքերի մոտ ու վարչական շենքում, հավաքվել են մի խումբ անձինք, ովքեր տարաբնույթ գործողությունների իրականացմամբ միջամտել են գործի քննությանն ու հասարակական անվտանգությանն սպառնացող զանգվածային անկարգություններ են կատարել:
«Մասնավորապես՝ վերջիններս կոչեր են հնչեցրել արգելափակել համայնքապետարանի վարչական շենքի մուտքերը, որպեսզի հնարավոր չլինի տեղափոխել ձերբակալված ու համայնքապետարանի վարչական շենքում գտնվող անձանց, վնասել են Ոստիկանության ծառայողական փոխադրամիջոցի անվադողերը, համայնքապետարանի վարչական շենքի գույքը, այդ ընթացքում Ոստիկանության ծառայողների կողմից օրինական ծառայողական գործունեությանը միջամտելու նպատակով բռնություն են գործադրել վերջիններիս նկատմամբ, նրանց ուղղությամբ նետել են կրակայրիչներ և շշեր, վերջիններիս հասցեին հնչեցրել վիրավորական արտահայտություններ։
Քրեական վարույթի նախաքննության ընթացքում ձերբակալվել է 37 անձ:
19 անձի նկատմամբ հարուցվել է հանրային քրեական հետապնդում՝ Քրեական օրենսգրքի 327-րդ հոդվածի 1-ին մասով (զանգվածային անկարգություններին մասնակցելը) և 486-րդ հոդվածի 2-րդ մասի 1-ին կետով (մի խումբ անձանց կողմից նախնական համաձայնությամբ արդարադատության իրականացմանը կամ գործի քննությանը միջամտելը), 10 անձի նկատմամբ՝ 486-րդ հոդվածի 2-րդ մասի 1-ին կետով (մի խումբ անձանց կողմից նախնական համաձայնությամբ արդարադատության իրականացմանը կամ գործի քննությանը միջամտելը) և 46-327-րդ հոդվածի 1-ին մասով (զանգվածային անկարգություններին մասնակցելուն դրդելը):
Քրեական վարույթի նախաքննությունը շարունակվում է»,-հայտնում են ՔԿ-ից։
Եվգենյա Համբարձումյան
