11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Ավինյանն ավելի խիստ միջոցներ պետք է ձեռնարկեր. Մելիքյանը՝ լրագրողին ծեծի ենթարկելու դեպքի մասին․ ՏԵՍԱՆՅՈՒԹ
Հասարակություն
22.10.2025 | 14:31
«Լրագրող Հակոբ Կարապետյանի գրառումը սուր քննադատական է եղել, սակայն չի պարունակել վիրավորանք, հայհոյախոսությունը սկսվել էր հետո, երբ քաղաքապետարանի պաշտոնյան արձագանքել է դրան»,- անդրադառնալով շաբաթներ առաջ լրագրողի նկատմամբ կիրառված բռնության դեպքին՝ ասաց Խոսքի ազատության պաշտպանության կոմիտեի նախագահ Աշոտ Մելիքյանը։
Հիշեցնենք՝ Հակոբ Կարապետյանը օգոստոսի 27-ին գրառում էր կատարել այն մասին, որ Երևանի քաղաքապետարանի տեսուչները ավտոբուսում տուգանել են մի կնոջ, որն իրականում վճարել է իր ուղեվարձը։ Գրառման մեջ լրագրողը գրել էր՝ «նեղմիտ ու ոչ կոմպետենտ կառավարիչներ ունենալը սա է. կյանքդ դարձնում են ամենօրյա պայքար կաստում-շլվարավոր տգետների արտադրած թյուրիմացության դեմ»։ Հենց նույն օրը երեկոյան հայհոյախառն հաղորդագրություններ է ստացել «Ավետ Բաբայան» անունով օգտատիրոջից։ Օրեր անց, ուշ երեկոյան, աշխատանքից դուրս գալուց հետո Կարապետյանը դիմակավորված անձի կողմից դաժան ծեծի էր ենթարկվել, նախաձեռնվել է քրեական վարույթ, ըստ լրագրողի՝ սա Բաբայանի կողմից հաշվեհարդար է եղել։
«Պաշտոնյան իր կողմից թույլ է տվել շա՜տ մեղմ ասած, ծանր խախտում, որը հարիր չէ պաշտոնյային, և Տիգրան Ավինյանն ավելի կոշտ միջոցներ պետք է ձեռնարկեր։ Կա վարկած, որ հենց այդ գրառման հետ էլ կապված հաջորդած բռնությունը, ուստի սա պետք է շատ արագ բացահայտվի՝ հետագա նմանօրինակ միջադեպերը կանխելու համար»,- իր խոսքում նշեց Աշոտ Մելիքյանը։
Մանրամասները՝ տեսանյութում։
