01.11.2026 | 13:04
Միրզոյանն ու Եգիպտոսի ԱԳ նախարարը քննարկել են երկկողմ կապերի ընդլայնման հնարավորությունները
TRIPP նախագծի իրականացումը կարող է դառնալ «Զանգեզուրի միջանցքով» Միջին միջանցքի նոր մաս․ Բայրամով
Քաղաքականություն
22.10.2025 | 15:09
Ադրբեջանի և Հայաստանի միջև հարաբերությունների կարգավորման գործընթացում կարևոր են խաղաղության համաձայնագրի նախաստորագրումն ու ԵԱՀԿ Մինսկի խմբի լուծարման վերաբերյալ համատեղ հայտարարությունը։ Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը Բաքվում Էստոնիայի արտաքին գործերի նախարար Մարգուս Ցահքնայի հետ համատեղ մամուլի ասուլիսում։
«Օգոստոսի 8-ից ի վեր մենք տեսել ենք գործընթացի դրական արդյունքները։ Ինչպես նախագահը նշել է Վաշինգտոնում՝ մեզ համար խաղաղությունն արդեն իսկ կայացել է։ Մինսկի խմբի լիակատար լուծարումը տեղի կունենա մինչև դեկտեմբերի 1-ը»,-նշել է Բայրամովը։
Ադրբեջանցի պաշտոնյան անդրադարձել է նաև TRIPP-ին, և, այսպես կոչված, «Զանգեզուրի միջանցք» եզրույթն օգտագործել՝ նշելով, որ տրանսպորտային տարանցման հարցերը Ադրբեջանի և Եվրամիության միջև քննարկման հիմնական թեմաներից են։
«Մենք գիտենք, որ ԱՄՆ-ի և Հայաստանի միջև TRIPP նախագծի իրականացման վերաբերյալ բանակցությունները շարունակվում են։ Դրական զարգացում է այն, որ Ադրբեջանը թույլատրել է բեռնափոխադրումներ կատարել դեպի Հայաստան իր տարածքով։ Սա վերաբերում է հացահատիկի տեղափոխմանը։ Հացահատիկը Ղազախստանից Հայաստան կհասցվի Ադրբեջանի միջոցով։ Մենք քննարկում էինք տրանսպորտը, կապը և Միջին միջանցքը, քննարկվում էր նոր պոտենցիալ նախագիծ։ Վաշինգտոնի գագաթնաժողովից հետո համաձայնեցված TRIPP նախագծի իրականացումը կարող է դառնալ Միջին միջանցքի նոր մաս՝ Զանգեզուրի միջանցքի միջոցով՝ ավելի լայն ձևաչափով։ Սա կարող է ստեղծել նոր երթուղի 15 միլիոն տոննա բեռի համար և խոստանում է նոր օգուտներ Եվրոպայի, Կենտրոնական Ասիայի և Ասիայի երկրների համար»,-հայտարարել է Ադրբեջանի ԱԳ նախարարը։
Նրա խոսքով՝ սա կարող է նաև դրական ներդրում ունենալ տարածաշրջանի բոլոր երկրների տնտեսություններում։
Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները, այդ թվում՝ նախագահ Իլհամ Ալիևը շարունակում են «միջանցք» եզրույթն օգտագործել՝ խեղաթյուրելով նաև ստորագրված փաստաթղթերի բովանդակությունը։
Թարգմանությունը՝ Էմմա Չոբանյանի
