05.12.2025 | 21:37
Մյասնիկյան պողոտայում մեքենա է այրվել
Նաթան արքեպիսկոպոս Հովհաննիսյանը հարցաքննվել է
Հասարակություն
22.10.2025 | 13:08
Համացանցում տարածված ձայնագրության վերաբերյալ ստացված հաղորդման առթիվ նախաձեռնված քրեական վարույթի նախաքննության ընթացքում անձը հարցաքննվել է։ Այս մասին հայտնում են Քննչական կոմիտեի մամուլի ծառայությունից։
Factor.am-ի տեղեկություններով՝ խոսքը Մայր Աթոռի Արտաքին հարաբերությունների և արարողակարգի բաժնի տնօրեն Նաթան արքեպիսկոպոս Հովհաննիսյանի մասին է։ Ձայնագրության 2-րդ գործող անձը կաթողիկոսի նախկին գավազանակիր Աղան աբեղա Երնջակյանն է։
Հիշեցնենք՝ մի շարք լրատվամիջոցներում օրեր առաջ մի ձայնագրություն է հրապարակվել, որտեղ հեռախոսազրույց է ընթանում 2 հոգևորականների միջև։ Տարածված ձայնագրությունում նրանցից մեկը նշում է․ «Կաթողիկոսն ինձ ասում ա՝ ինչի ընտանիքիդ չես վերցնում, գնաս միտինգ անես Նիկոլի դեմ․․․»։
Հոգևորականները քննարկում են նաև տնից հեռու ծառայության նշանակվելու հարցը․ «Ինձ 200 կմ իմ տնից հեռու նշանակում են, եթե իմանամ՝ դրանից հայ եկեղեցին փրկվում ա, ես սիրով 2000 կմ էլ կգնամ, բայց եթե ես իմ մորը և ընտանիքին պիտի թողնեմ, գնամ Վանաձորում ապրեմ, որ զուտ մի մարդ տենց ա ուզում և իմ կյանքում դիսկամֆորտ ա ուզում, ես չեմ ընդունում էդ դիսկամֆորտը իմ կյանքում»։
Մայր Աթոռից արձագանքել էր ու նշել՝ Ամենայն Հայոց Կաթողիկոսին վերագրվող նման արտահայտությունների շրջանառման նպատակն է վարկաբեկել և թշնամանք հարուցել Եկեղեցու և եկեղեցականների նկատմամբ, սակայն հայտարարությունը չի անդրադառնում ձայնագրության բովանդակությանը։ «Հեռախոսային խոսակցությունների գաղտնիության խախտումը ինքնին հանցագործություն է և առանձին թեմա, որին իրավապահ մարմինները հույս ունենք, որ համարժեք արձագանք կտան»,- մասնավորապես ասված է Մայր Աթոռի հայտարարության մեջ։
Հայր Աղան Երնջակյանը նույնպես անդրադարձել է օրեր առաջ իր և Նաթան արքեպիսկոպոս Հովհաննիսյանի հեռախոսազրույցին՝ խնդրելով, որ Հայ Առաքելական Սուրբ Եկեղեցու բարձրաստիճան հայրերն ու Եկեղեցու պատկան կառույցները պատասխանեն հասարակությանը և հավատացյալներին հուզող հարցերին։
Եվգենյա Համբարձումյան
