Արյուն ուզողը մենք չենք, դուք եք ընտրել Վարդան Ղուկասյանին․ Ալեքսանյանը՝ Գրիգորյանին․ ՏԵՍԱՆՅՈՒԹ

«Ասում եք՝ ՔՊ-ական պատգամավորները արյուն են ուզում Գյումրիում, ու, ենթադրաբար, հղում եք անում իմ խոսքերին, որոնցում ես ասում եմ՝ Վարդան Ղուկասյանը կամ նրա կլանը սպանել է ձեր ընկերներին, ու նրան քվե եք տվել: Ասում եմ, բայց դա չի նշանակում, որ ես արյուն եմ ուզում, հակառակը: Դա նշանակում է, որ ես արյուն չեմ ուզում: Մեզ մեղադրում էիք, ասում էիք՝ ուզում եք Վարդանիկի միջոցով իշխանություն տանեք Գյումրիում, բայց դուք եք գնացել Վարդան Ղուկասյանին ընտրել քաղաքապետ: Դո՛ւք եք արյուն բերող քաղաքապետի ընտրել»,- այս մասին ԱԺ նիստում հայտարարեց ՔՊ պատգամավոր Վահագն Ալեքսանյանն՝ արձագանքելով Մարտուն Գրիգորյանի ճեպազրույցում արված հայտարարությանը։

«Դուք ինձնից լավ գիտեք, որ Գյումրիի ամենաաղմկահարույց սպանությունները, գրեթե բոլոր, կատարվել են էն ժամանակ, երբ Վարդան Ղուկասյանը եղել է քաղաքապետ, երբ նրա կլանն այդ քաղաքում եղել է իշխանություն: Ու սա իմանալով՝ դուք գնացել ու ընտրել եք Վարդան Ղուկասյանին։ Ես հո գիտեմ՝ դուք, ձեր ընտանիքը, ընկերները չեք ուզում, որ ձեր երեխաները մեծանան մի քաղաքում, որտեղ Վարդան Ղուկասյանն է քաղաքապետ»,- հայտարարեց Ալեքսանյանը՝ դիմելով Մարտուն Գրիգորյանին։

Նշենք, որ Մարտուն Գրիգոյանն ԱԺ-ում լրագրողների հետ ճեպազրույցում խոսել էր Վարդան Ղուկասյանի կալանավորման մասին։

Նա կարծիք էր հայտնել, մասնավորապես, ասելով․ «ՔՊ պատգամավորներից մարդ կա, ում սիրտն արյուն է ուզում Գյումրի քաղաքում։ Առավոտից իրիկուն այդ մարդու խոսույթը դա է։ Այս մարդկանց սիրտն արյուն է ուզում, Փարաքար-2 է ուզում, և այդ ամենն ուզում են, որ լինի Մարտուն Գրիգորյանի ու Վարդան Ղուկասյանի ընտանիքների, թիմերի միջև»։

Մանրամասները՝ տեսանյութում։

Մանյա Պողոսյան