Առաջիկայում կարող ենք Հայաստան-Թուրքիա սահմանի բացում ունենալ․ Փաշինյան․ ՏԵՍԱՆՅՈՒԹ

Թուրքիայի հետ Հայաստանի ծավալած երկխոսությունը հույս է տալիս, որ առաջիկայում կարող ենք Հայաստան-Թուրքիա սահմանի բացում ունենալ։ Այս մասին ՀՀ վարչապետ Նիկոլ Փաշինյանը հայտարարել է Թբիլիսիում ընթացող «Մետաքսի ճանապարհ» 5-րդ համաժողովի ժամանակ։

«Մենք ոչ միայն քաղաքական, այլև տեխնիկական առումով պատրաստ ենք հենց այսօրվանից ՀՀ տարածքով ապահովել բեռնատար ավտոմեքենաների տարանցումը Թուրքիայից դեպի Ադրբեջան և Ադրբեջանից դեպի Թուրքիա»,- նշել է նա։

Փաշինյանի խոսքով՝ ՀՀ տարածքում թե՛ ճանապարհները, թե՛ սահմանային ենթակառուցվածքները պատրաստ են դրա համար Մարգարա-Եղեգնաձոր-Սիսիան-Գորիս երթուղով։

«Քաղաքական առումով մենք նույն կերպ պատրաստ ենք ապահովել Նախիջևանի Ինքնավար Հանրապետությունից դեպի Ադրբեջանի հիմնական մաս և հակառակ ուղղությամբ տարանցումը Հայաստանի տարածքով, բայց տեխնիկապես դեռևս պատրաստ չենք՝ ենթակառուցվածքների բացակայության պատճառով։ Քաղաքական իմաստով պատրաստ ենք նաև երկաթուղային տարանցումն ապահովել Թուրքիայի և Նախիջևանի միջև, ինչպես նաև Թուրքիայի և Ադրբեջանի հիմնական մասի միջև, բայց այդ հատվածներում երկաթուղին նորոգման կամ կամ վերակառուցման կարիք ունի»,- նշել է նա՝ ընդգծելով, որ այդ հարցերը 2-3 տարվա ընթացքում կարող են լուծվել։

Վարչապետը հայտնել է նաև, որ առաջիկայում ՀՀ տարածքով Ադրբեջանից դեպի Նախիջևան, ինչպես նաև Ադրբեջան-Հայաստան-Թուրքիա խողովակաշարեր և էլեկտրահաղորդման գծեր կկառուցվեն։

Մանրամասները՝ տեսանյութում։

Եվգենյա Համբարձումյան